Советниците на Левица од битолскиот Совет, Горан Велевски и Гаврил Трајковски се осудени за клевета изречена против Бојан Бојкоски советник на ВМРО-ДПМНЕ и заменик градоначалник на Битола.

Апелацискиот суд во Битола ја потврди пресудата на Основниот суд од Битола со која двајцата советници на Левица имаат граѓанска одговорност за клевета спрема Бојковски за Фејсбук статус од 25 ноември 2022 година во кој објавиле текст со невистини факти за советникот на ВМРО-ДПМНЕ.

Судот ја најде спорна Фејсбук објавата на Левица во која стои дека Бојкоски потпишувал сметки во кафеани во Битола на име на Општина Битола.

„Денови на раскош на Општина Битола. Четиригодишниот период во опозиција очигледно ги издигнал општинските функционери. Најчести гости во кафаните барем според нашите информации и потпишани сметки покрај локалните функционери биле заменик градоначалникот Бојан Бојкоски и секретарот на општината Борче Димитровски. Па така овие локални функционери потпишувале сметки од 500 евра, каде што се јаделе бифтеци, морска храна и се пиеле скапи пијалаци. Заменик градоначалникот бил особено великодушен, па покрај официјалните гости си канел и негови блиски пријатели на софрите. Во време на страшна економска криза каде што просечен граѓанин не може да си дозволи 150 денари дневно за храна, овие локални функционери трошеле по 6.000 денари дневно за софри.“

На вака пренесениот Фејсбук статус советникот на Левица Трајковски уште допишал – „За децата во градинките немаат, но за бифтеци имаат!.“   

Апелацискиот суд во пресудата пишува дека се задолжуваат тужените Горан Велевски и Гаврил Трајковски на истиот начин преку социјалната мрежа Фејсбук, со објава на профилот на „Левица Битола“ и на нивните лични профили да му се извинат на тужителот Бојан Бојкоски за споделената објава од ноември 2022 година во делот на текстот каде што е утврдена одговорност за клевета.    

Апелација наведува дека - Неспорно од изведените докази произлегува дека начинот како е објавен постот, со изборот и фондот на зборови и придавки насочени кон тужителот, тужените Горан и Гаврил ги поминале границите на правото на слобода на изразување и го наклеветиле тужениот, што според законот  е основ да се утврди одговорност за клевета. Всушност тужените советници на Левица не ја докажале вистинитоста на изнесеното тврдење.

„Првостепениот суд во конкретниот случај правилно ги применил критериумите за оправданото ограничување на слободата на изразување содржани во Европската конвенција за заштита на човековите права и во судската практика на Европскиот суд за човекови права“, стои во пресудата на Апелацискиот суд од Битола, досудена од судиите претседател на совет, Жаклина Доведен и членови на советот Дејан Крстанов и Ристо Сотиров.

Осудените советници од Левица се задолжуваат на Бојкоски да му ги надоместат судските трошоци. Апелацискиот суд не прифатил да му се исплати надомест за претрпена душевна болка на тужителот.

Бојкоски по пресудата на Фејсбук објави дека судот пресуди, советниците на Левица се виновни за клевета.

„Бев лажно наклеветен, а ја кажував само вистината. Зашто совеста ми беше сведок, а вистината штит! Вистината можеби доаѓа бавно, можеби оди тивко, но секогаш стигнува каде што треба. Левица треба да знаат: Се што е прикриено, ќе биде откриено и секоја тајна ќе биде јавно изнесена. Jac ќе продолжам по патот на вистината.“

Во исто време советниците од Левица споделија  дека – „Во 2022 година имавме објава околу угостителските расходи на општината со докази и податоци од  порталот ‘Отворени финансии’ кој има за цел да и овозможи на јавноста увид во податоците за реализација на трансакции на сите буџетски корисници на Буџетот на Република Македонија, со кои што располага Трезорот на Министерството за финансии. Бевме тужени за клевета од страна на ДПМНЕ и покрај сите докази и материјали кои ги презедовме од овој валиден портал за денес да пресудат во корист на виновниците.“

Анета Блажевска