Градоначалничката не прецизираше термини, но кажа дека започната е процедурата Битола да добие свој полигон, а канадидатите за возачки испит да не патуваат веќе во Прилеп и Ресен на обука за полигон и полагањето за полигонско возење за возачки испит.

- Да, полигонот е нарачан и се изработува во јавното претпријатие. Оваа власт, оваа владеачка гарнитура ја започна постапката на пренамена на земјиште, побара пренос на земјиштето во трајна сопственост , што е во процедура и оваа владечка гарнитура го нарача проектот. Ако сите овие години наназад додека битолчани одеа во Прилеп  и Ресен беше правено, сега ќе имавме веќе полигон. Но, пак ќе кажам без тие процедури немам намера ништо да работам, рече градоначалничката Петровска.  

Градоначалничката Петровска во март годинава, на Фејсбук најави дека е добиена трансформацијата на земјиштето и дека ја имаат локацијата за полигон за полагање. Потоа во април најави дека полигонот ќе биде лоциран во населбата Горно Оризари.

Битола веќе 5-та година е без полигон за полагање, откако Секторот за управно-надзорни работи при МВР во 2013 година, поради неисполнување на пропишаните стандарди, донесе решение за забрана за користење на полигонот за полагање возачки испити во Битола. Кандидатите овие години полагаа на изнајмените полигони во Ресен и во Прилеп.