-Ние дојдовме пак, дали имате куфер за во еден правец?- ми вели семеен битолчанец кој пред две години исто така купи куфер од мојот дуќан кога заминуваше во Шведска на печалба. Таму работеше како возач на камион. Сега, ми вели муштеријата -дојдов да си ја земам и фамилијата , повеќе не се враќам, затоа купувам и авионска карта и куфер за во еден правец, раскажува нашиот соговорник.

Иселениците според него ги има од сите возрасти  и од сите етнички заедници, со различен степен на образование.

Горан  Пинза од туристичката агенција „Глобус клуб“ во Битола , вели дека иселувањето е во континуитет, а во неговата агенција доаѓаат битолчани кои купуваат авионски билети за прекуокенските земји и Европа или пак автобуски карти најчесто за Германија.

-Во последниот период нашите од овој крај ја претпочитаат Европа, особено од младите или студентите кои таму заминуваат да работата во ланците за брза храна и  тоа на период од три месеци ако се со македонски пасош или на подолг период ако имаа бугарски пасош.  Билети купуваат невработени или лица со пониски примања и најчесто велат дека заминуваат во потрага по подобра егзистенција за себе или за семејството, вели Пинза.

Според него Гераманија е најбараната дестинација воопшто за битолските печалбари, бидејќи имаат повеќе инфорамции од своите блиски роднини или пријатели како можат побрзо да се снајдат во новата средина со работа, стан и се' што им е потребно за престој.

-Бараат билети за Германија бидејќи се добро запознати со сите детали околу престојот таму, за слободни работни места, за висината на платата инфорамации кои ги добиле од своите роднини и другари кои веќе се таму со години. За Германија се купуваат билети и за авионски и за автобуски превоз, вели Пинза.