Д-р Светлана Поповска Кљусева Специјалист по епидемиологија ВД Директор на ЈЗУ Центар за јавно здравје- Битола со комплетна информација за АПЛА што покажаа анализите на надлежните институции во врска со труењето со храна во РЕК Битола.
Информацијата ви ја пренесуваме во целост. "Во текот на увидот извршен на 25.03.2026 година во кујната на РЕК Битола, беа земени примероци од храна, брисеви од персоналот, како и брисеви од нежива средина.
Според добиените резултати од анализите:
- Од вкупно 9 анализирани мостри на храна во Институтот за јавно здравје – Скопје, не е утврдено присуство на патогени бактерии;
- Од 15 земени брисеви од работни површини анализирани во Центарот за јавно здравје – Битола, кај 7 мостри не се исполнети хигиенските стандарди, односно е утврден зголемен број на непатогени бактерии;
- Од 9 брисеви од раце на персоналот, 2 се микробиолошки неисправни;
- Од 9 брисеви од нос кај вработените, кај 1 лице е утврдено присуство на стафилокок.
Кај 24 пациенти кои доставиле примероци од фецес за анализа во Центарот за јавно здравје – Битола, утврдено е присуство на Salmonella група D.
Врз основа на клиничката слика и лабораториските наоди од пациентите, состојбата укажува на појава на салмонелоза.
Позитивните наоди од брисевите од работни површини укажуваат на пропусти во одржувањето на хигиената и потреба од нејзино подобрување, но не претставуваат директна причина за појавата на епидемијата.
Причинител за зголемениот број заболени е бактеријата Salmonella, која согласно важечките прописи за микробиолошка безбедност на храната не смее да биде присутна, ниту во готов производ ниту во суровини. Познато е дека оваа бактерија при собна температура има способност за брзо размножување, што најверојатно придонело за појавата на заболувањата.
Сите заболени лица се вработени во рудникот, каде храната била дистрибуирана како спакуван оброк и консумирана со временско одложување.
За разлика од нив, вработените во термо храната ја консумирале веднаш по подготовката, при што кај нив не се евидентирани заболени лица," изјави за АПЛА Д-р Светлана Поповска Кљусева Специјалист по епидемиологија ВД Директор на ЈЗУ Центар за јавно здравје - Битола
