Мнозинството во Советот на Општина Битола на вчерашната седница прифати две иницијативи предложени за подобри услови за децата со посебни потреби и нивните семејства и за изградба на „Македонско-американски парк“ кај местото викано „Авионите“ во Битола.

Првата иницијатива мерки за обезбедување подобри услови за децата и семејствата на децата со посебни потреби ја предложи советникот на ЛДП Димитар Кузмановски, додека иницијативата за „Македонско-американски парк“ кај „Авионите“ во Битола ја предложи советничката на СДСМ Софија Ристевска-Петрушевска.

Мнозинството во Советот на Општина Битола предводено од ВМРО-ДПМНЕ и коалицијата, потоа СДСМ со коалицијата, ПОИНАКУ, ЛДП, ЗНАМ, ГРИН, ДУИ ги прифатија иницијативите и накрај со 27 гласа „за“ ги изгласаа. Против иницијативите беа двајцата советниците на Левица.  

Ова е еден од ретките примери досега каде политичките ривали се спојуваат со една цел - во интерес на битолчани.  

Претседателот на Советот на Општина Битола, Бојан Бојкоски објави дека Советот делувал заеднички за подобра Битола.

„На вчерашната 11-та седница на Советот на Општина Битола беа усвоени две иницијативи предложени од опозициските советници. Ова е уште еден доказ дека кога станува збор за интересот на граѓаните, добрите идеи немаат политичка боја. И покрај тоа што имаме мнозинство, како советничка група на ВМРО-ДПМНЕ ќе продолжиме да ги поддржуваме сите квалитетни предлози кои носат развој, грижа и подобар живот за битолчани.

Веруваме дека со меѓусебна почит, дијалог и соработка можеме да постигнеме многу повеќе. Очекуваме и во иднина поддршка за програмите и иницијативите кои се предлагаат, затоа што целта треба да ни биде заедничка подобра Битола за сите!“, објави Бојкоски.

Советникот на ЛДП Димитар Кузмановски предложи четири точки: Обезбедување на ваучери за деца категоризирани со наод и мислење според МКФ, за користење дефектолошки, логопедски и психолошки третмани. Доделување на еднократна финансиска помош на децата со посебни потреби. Обезбедување на бесплатен паркинг и бесплатен автобуски превоз за родители на деца со аутизам ( дијагноза F84). Подготовка на програма и финансиска рамка за поддршка на деца со посебни потреби на локално ниво.

„Тие дечиња секојдневно ги посетуваат овие професионалци каде што се работи на нивниот говор, движење...често посетуваат и приватни логопеди, дефектолози и психијатри, а еден час станал голем луксуз околу 1.000 денари. Затоа потребен е ваучер за да им олесниме околу трошоците. Доделување на еднократна финансиска помош за децата со посебни потреби е потребно оти едниот родител најчесто  не работи за да биде со детето, максималниот износ што е треба да им се додели. На родителите на овие деца да им се овозможи и бесплатен паркинг, нема да пропадни ЈП Паркинзи Битола. Во иднина треба да им помагаме на овие наши сограѓани со програма и финансиска рамка  а не со ат хок решенија“, рече советникот Кузмановски и додаде дека со советничката од ВМРО-ДПМНЕ Марина Крстиќ ќе ги разработат сите предлози од оваа инцијатива за нивна имплеметација.  

Советничката на СДСМ Софија Ристевска-Петрушевска на иницијатива на младиот Јане Велкоски предложи изработка на проектна документација за изградба на „Македонско-американски парк на пријателството” на локацијата кај „Авионите“ (Смолево) Битола, каде што веќе се поставени авиони од американски производител. Целта на оваа иницијатива е уредување и трансформација на просторот во современ и репрезентативен парк кој ќе претставува симбол на пријателството, соработката и партнерството помеѓу Македонија и САД.

Во рамки на иницијативата се предлага: поставување на македонско и американско знаме со соодветни јарболи, хортикултурно и партерно уредување на просторот, поставување на урбана опрема (клупи, корпи за отпадоци, осветлување), поставување на симболично обележје или табла посветена на   македонско- американското пријателство, создавање нов туристички, рекреативен и јавен простор за граѓаните и посетителите на Битола.

„Сметам дека ваков парк ќе претставува значајна додадена вредност за градот, ќе придонесе кон афирмација на Битола како отворен и модерен град и ќе испрати позитивна порака за меѓународна соработка и пријателство. Воедно, планирам да се обратам и до Амбасадата на САД во Скопје со цел поддршка и понатамошна соработка околу реализацијата на проектот“, рече Ристевска-Петрушевска.

Покрај овие иницијативи, мнозинството советници вечар ги усвоија и извештаите од општинските програми со реализација над 75%, што според претседателот на Советот, Бојкоски, претставува уште еден показател за посветена и одговорна работа на Советот.

Анета Блажевска