Битола за мене е дом, семејство, живот, вели Христо Кондовски во интервју за Апла.мк

Април 25, 2024

Директно

Октомври 10, 2021

Денот го започнувам- секогаш со добра и позитивна мисла, шолја кафе и прегратка од дечињата и сопругата.

Најголемата моја доблест е -чесниот пристап кон луѓето, доследноста кон работата, признавање на сопствените грешки, подготвеноста за сугестии и сопствен развој.

Навика што сакам да ја променам е -зависноста од се повеќе работа и постигнувања, што ме прави работохолик, но со надеж за мојот иден ангажман во нашата општина, опстојувањето на оваа моја навика веројатно ќе продолжи.

Највредното нешто во мојот живот е- семејството и работата..

Мое најголемо достигнување во поглед на работата е изградбата на мојата корпорација која заедно со партнерите ја издигнавме од мала претприемачка идеја во која денес работат стотици млади луѓе.

Во Битола најмногу ме нервира- иако „ме нервира“ е предимензиониран термин, сепак би рекол дека малку ме иритира тоа што не е доволно искористен потенцијалот на нашата Битола. Ве уверувам, со посветена работа Битола може да биде велеград.

Во Битола никогаш не би ги променил- нишките од кои извира нашиот космополитизам, битолската гордост и достоинството.

Мојата најважна животна лекција е – упорноста и трпението поткрепени со знаење и енергичност, прават чуда.

Битола за мене е дом, семејство, живот...

Политиката за мене е- можност да придонесам за Битола, за моите сограѓани, за сите нас заедно - вложувајќи ја цела моја енергија, знаење и стекнато искуство.

Градоначалничката функција ќе ми даде моќ за- Функцијата ќе ми го даде институционалното право да дадам значаен придонес во заедницата, додека моќта и енергичноста ги гледам како алатка, заедно со целиот тим, да испорачаме ефикасна Општина во целосна функција на граѓаните.

Ако згрешам дури сум градоначалник - човечки е да се греши, доколку грешките се мали тие се добра основа да се променам кон подобро, доколку се крупни и стратешки, логичен чекор е оставка. Но, такви грешки никогаш не би си дозволил, затоа што влегувам во овој предизвик со единсствен мотив - да придонесам за подобар живот во Битола за сите граѓани.

Кога ми поставуваат незгодни прашања јас- давам одговори кои извираат од мене, без задршка. Одговорите на незгодните прашања се најдобар репер за нечија искреност и подобност.

Почитувам туѓо мислење- секогаш! Особено кога е поразлично и подобро од моето.

Парите за мене се- само ресурс кој треба мудро да се инвестира во подобро утре.

Кога работам под притисок јас- сум продуктивен и проактивен, всушност така работам и кога притисокот е мал, но секако дека тоа дава стимул плус кон ефикасност и побрза испорака на резултати.

Кога ќе се преработам јас- мојата обнова ја барам во спокојот со семејството и пријателите.

Лицемиерие за мене е- една од најлошите човечки особини која подразбира комуникација спротивна од тоа што се мисли и чувствува.

Лакомоста за мене претставува- грев кој не си го дозволувам.

Се опуштам така што- читам, спортувам, „кафесувам“ со моите другари и најважно од се уживам во спокојот на моето семејство.

Сподели