Општина Битола ќе обезбеди средства за да се заштитат најновите археолошки наоди, во кои има и остатоци од црква, во дворот на Јени џамија во Битола. Откако ќе заврши комплетно реставрацијата и конзервацијата  на наодите во дворот, тој дел ќе биде застаклен како што е случај во ватрешноста на џамијата каде можат да се видат темели од поранешни цркви кои беа пронајдени во рамки на археолошките истражувања што подолго време се одвиваа во и околу џамијата.

Остатоци од црква и три гроба со движни добра се пронајдени при најновите археолошки истражувања во дворот на Јени џамија во Битола, потврди  Мери Стојанова, директорката на битолски Завод и Музеј.

„При последните археолошки истражувања се откриени делови од западниот ѕид на црквата, северниот ѕид на тремот на црквата, како и два придружни ѕида од различни архитектонски фази. Покрај овие елементи, откриени се и три гроба со движни добра, масивна мермерна база со отвори за оловни стеги и друго. Овие недвижни и движни добра понатаму ќе бидат предмет на стручно проучување и се очекува да дадат значајни податоци за средновековна Битола“, вели Стојанова.

Во однос на заштитата на недвижните добра, се бара начин за најсоодветна презентација на археолошките наоди, без притоа да се наруши комплетниот амбиент.

„Улога во реализацијата на идеите играат и финансиските средства, чиј обем ќе произлезе од проектот кој е речиси целосно изработен. Во изминатиот период презедовме одредени зафати за да се заштитат наодите, особено од временските влијанија“, изјави Стојанова.

Истражувањата од изминатите години покажаа дека Јени џамија крие темели на три цркви, од седми, 11. и од 13. век и се смета дека меѓу нив е и некогаш најголемата раносредновековна црква во центарот на Битола, „Св. Ѓорги“. При ископувањата во џамијата беа пронајдени два печата, сребрен со ликот на Свети Ѓорѓи и друг со ликот на Богородица. За највреден пронајдок се смета пекторалниот медалјон на кој се изгравирани позлатени фигури на светци.

„Се смета дека еден печат му припаѓал на видно семејство, на некој од следбениците на цар Самоил. Се смета дека во 11. век ова место било епископско седиште“„ кажа археологот во пензија Гордана Филиповска-Лазаревска, која учествуваше во ископувањата.

Во внатрешноста на џамијата веќе е ставен стаклен под, под кој се гледаат темелите од црквите. Целта е објектот да ги обединува христијанското и исламското културно наследство. Државата досега вложи 15 милиони денари во истражувањата и реставрацијата. Во годинашната Програма за финансирање проекти од национален интерес на Министерството за култура предвидени се 300.000 денари за конзерваторски проект за ентериерот на Јени џамија и уште 250.000 денари за археолошки ископувања.

Извор: https://sdk.mk/index.php/dopisna-mrezha/novi-ostatotsi-od-tsrkva-i-tri-groba-pronajdeni-vo-dvorot-na-jeni-dhamija-vo-tsentarot-na-bitola/

Се конзервира минарето на битолската Јени џамија високо околу 40 метри. Проектот и надзорот се на битолски Завод и музеј, а средства се обезбедени од Министерството за култура. Поради висината на минарето, околу него се монтира скеле кое треба да овозможи безбедност за работниците кои ја изведуваат конзервацијата.

Битолскиот Завод и музеј ги започна археолошките истражувања на новопронајдените остатоци од црквата Св. Ѓорѓија кај битолската Јени Џамија, кои се откриени на почетокот на годината при реконструкција на фонтаната пред џамијата.