Во  рамките на БИТ ФЕСТ, денес и утре продолжува програмата на „Џез фабрика фестивалот“.

Во изминатите шест месеци од оваа година, полициските службеници на Секторот за внатрешни работи Битола привеле 31 лицe кои со судски наредби се барале за издржување и доиздржување на затворски казни на подрачјето на СВР Битола.

Најголемиот број од нив биле спроведени во Казнено-поправната установа Затвор „Битола“, а биле осудени на затворски казни за имотни деликти, неовластено производство и пуштање во промет на наркотични средства и други дела.

Одделението за криминалистичка полиција при СВР Битола на 07.07.2022 поднесе кривична пријава по член 236 од КЗ против Ѓ.З.(31) од Битола. Тој бил баран по централен распис од СВР Битола, поради сомнение за сторено кривично дело „тешка кражба“ по член 236 од Кривичниот законик.

Во координација со полициски службеници од СВР Охрид тој бил лишен од слобода во еден сместувачки објект на подрачјето на Охрид, при што извршени се и претреси. Притоа, кај него биле пронајдени пари (во различни апоени и валути) и повеќе други предмети за кои постои сомнение дека потекнуваат од кривично дело како и алати и средства погодни за извршување на кривични дела -тешки кражби, како и прашкаста материја.

НА ДЕНЕШЕН ДЕН

Денес низ битолските улици за жал, се поретко може на Иванден да се чуе песната „Тајане-Бојане“.Уште само во неколку маали остана да се практикува стариот адет. Попривлечни се телефоните од групните игри и детски обичаи од минатото кои помагаа да се гради другарството и заедништвото.

Децата од Битола некогаш со големо нетрпение чекаа да дојде Иванден, еден од големите христијански празници од летниот циклус кога се слави раѓањето на Свети Јован Крстител. Нетрпеливо чекаа зашто на тој празник адет беше да се организира детска маалска свадба, односно да се спроведи на дело обичајот Тајане-Бојане. Од дечињата во улицата се одбираа зет, невеста, свекрва, кум, девер и сватови. Се полнеше ѓумче со вода од три чешми зашто во тоа време сѐ уште функционираа малските чешми. Се закитуваше со цвеќиња. На главите на девојчињата се стваа венчиња од цвеќиња зашто со Иванден од памтивек биле поврзани верувања за моќта на цвеќињата.Секој се облекуваше согласно улогата што ја имаше. 

Сонита Фејсовска, Оран Јашаровски и Архан Асланоски се тројца млади битолчани од ромска националност, кои со својот талент, квалитет и трудољубивост, постигнуваат високи резултати, ги рушат табуата и ја промовираат Битола. 

Градоначалникот на општина Битола, Тони Коњановски, согледувајќи ги високите резултати кои ги постигнаа овие млади луѓе во спортот и образованието, организираше заедничка средба на која им честиташе за успесите, поттикнувајќи ги и понатаму да продолжат да се надградуваат, да напредуваат и на тој начин да бидат промотори на Битола, но и успешно да продолжат да ја градат својата иднина.

На средбата со градоначалникот, Сонита Фејсовска, ја раскажа својата приказна како некогашната далечна можност, еден ден да биде студент, после многу упорност и благодарение на нејзината амбициозност и јасна визија, денес ја доведе до дипломец на Педагошкиот факултет, првенец на генерација со просек 9,80.

Оран Јашаровски, како член на боксерскиот клуб „Куманово 84“ го освои годинешниов трофеј на Меѓународниот боксерски турнир „Мирослав Петровиќ“, кој по вторпат се одржа во Куманово. Јашаровски информираше дека, на турнирот учествуваа дваесетина боксери од Македонија, Србија, Црна Гора, Бугарија и Косово, а беа одиграни околу 20 мечеви.

На светскиот куп во куглање, пак во категоријата У18 во Естонија, младиот битолчанец Архан Аслановски, како претставник на Македонија со исклучителна игра успеа да влезе во најдобрите 8 машки играчи на Светскиот Куп, пласирајќи се на 7 место.

„Ваквите резултати, потврдуваат дека Битола има многу талентирани млади луѓе од различни националности, кои и понатаму ќе ја имаат заслужената поддршка од локалната самоуправа“, соопштија од Општина Битола. 

Како дел од програмата на битолското културно лето, вчера во Битола, започна Балкан гала фестивалот. На првата концертна вечер на рок симфонија во придружба на Камерниот оркестар на Битола, настапија Ристо Вртев - Архангел, Гиле - Електрични Оргазам, Михајло Трајковски - Сак, Петар Младеновски - Суперхикс, Ружица - Ареа и Жарко Јакимоски.