Во оваа документарн театарска претстава која е проект на „Интимен театар“ од Битола, учествуваат битолчанките Невена Стерјевска, Катерина Петровска, Трендафилка Киклевска и Зорица Цибалевска, жени кои успешно се борат со ракот на дојка или на матка, а Цибалевска посебно беше фокусирана на пораките од нејзината мајка Летка Андреевска која го загуби живото во борбата со болеста.

-Иако сме во 21 век, темата која ја претставивме, борбата со ракот, се уште е табу тема. Ние, што некои не нарекуваат „глумци“, иако по вокација не сме тоа, сепак сме активни актери во борбара со ракот. И верувајте многу храбро се носиме со тоа, напиша на својот ФБ профил, Катерина Петровска, една од учесничките во претставата. Таа и и се заблагодари на публиката за големата и искрена поддршка на синоќешната премиера.

Целта на овој театарски проект е да се подгигне свеста за редовни прегледи и брзо дијагностицирање на болеста која има епидемски размери, посебно во Пелагонискиот регион. Идејата за оваа претстава се родила кај режисерката и сопственик на „Интимен театар“ Софија Ристевска уште во 2017 година, по што ова лето почна да се реалзира проектот за создавање театарка претстава во којашто учествуваат жени болни од рак и зборуваат за болеста и нивната битка со неа.

Претставата е финансирана од Општина Битола и е дел од Бит фест 2019. По синоќшната премиера, втора изведба е закажана за 30 август, петок, во 20 часот, а третата изведба на 1 септември, недела, во 20 часот.

фото: Диоген Хаџи-Коста Милевски