За разлика од високите бројки на новозаболени на дневна основа кои во изминатите денови беа и до 57 лица, бројката денес падна на 22 заболени во Битола. По долго време за првпат имаме повеќе оздравени од болни евидентирани денес. Така, според билтенот на Министерството за здравство разболени се 22 битолчани, а 28 излекувани.

Како последица на КОВИД-19, денеска почина Агапи Чункоска(54), член на Советот на Општина Крушево од ВМРО-ДПМНЕ. Од неа се простија нејзините колеги од Советот.

Градоначалникот на Демир Хисар, Марјанче Стојановски, пред малку на официјалната ФБ страница објави дека е позитивен на КОВИД-19. Тој вели дека се заразил и покрај тоа  што ги почитувал сите мерки и препораки

Од вчера до денес драстично се зголеми бројот на битолчани позитивни на ковид-19. Ако вчера имаше 43 позитивни на коронавирус, денес новозаболени се 69 битолчани. Има и 14 оздравени. 

Градоначалничката на Општина Битола, Наташа Петровска, претставници од Советот на општината, како и делегација од Сојузот на борци, претставници од политичките партии и најмладите извидници од Битола, со положување на свежо цвеќе кај Споменикот на НОАВМ пред Центарот за култура, го започнаа денешното одбележување на 76 годишнината од ослободувањето на градот од фашистичкиот окупатор, во Втората светска војна. Во чест на загинатите борци кои ги положија своите животи и ја извојуваа денешната слобода, беше интонирана македонската химна, од страна на Битолскиот дувачки оркестар под диригентската палка на Марјан Бакревски.

Градоначалничката Петровска, испрати искрена честитка до своите сограѓани:

„Pрвпат после ослободувањето на Битола, се наоѓаме во вакви, исклучително тешки околности. Меѓутоа и во оваа криза на пандемија, остануваме простум да оддадеме почит кон ослободителите на нашиот град, кон нашата гордост. Низ звуците на химната и маршевите покажуваме дека во нас има жар за опстанок, дека во нас има желба за творење и за продолжување на нивното дело. Дека во нас, има љубов кон Битола, прикажана преку новиот симбол, кој што се наоѓа кај нашата Саат кула. Се што направивме оваа измината година, токму за продолжување на делото на нашите ослободители, нашите граѓани ќе можат да го видат вечер во документарниот филм, претставен на каналот на ТЕРА ТВ. Во оваа прилика, сакам да им го честитам празникот 4 Ноември на нашите битолчани и воедно да си посакаме добро здравје, за да празнуваме вековито“, изјави градоначалничката на Општина Битола, м-р Наташа Петровска.

По повод овој историски значаен датум за Битола, свежо цвеќе беше положено и на Партизанските гробишта во градот.

„Овој ден е многу значаен зашто Битола за првпат била ослободена од своите сограѓани, од партизаните кои во текот на НОБ ги положија своите животи за добробит на својата земја. Ние сме благодарни за се она што се направи од партизанските единици, среќни сме што ја имаме слободна Битола и слободно се развиваме и движиме кон подобар живот“, рече Александар Трајковски од Сојузот на борци на Битола.