На рационално користење на водата за пиење повикува првиот човек на ЈКП Водовод -Битола , Горан Козаров поради сушата што изминатиот период го зафати регионот и најавува зачестени контроли за евентуална злоупотреба на водоводниот систем.

Козаров вели дека состојбата е загрижувачка, но претпријатието со сите расположливи ресурси ја контролира ситуацијата.

-Апелираме на заштеда и рационално користење на водата од градскиот водовод, контролите од наша страна се зачестени и секоја злоупотреба ќе се казнува, вели Козаров.

Директорот на ЈКП Водовод вели дека заради сушата се приближуваме кон алармантно ниво , тоа значи дека шеснаесет недели со ред се пумпа вода од Хидросистемот Стрежево, интензивно со три-четири пумпи.  Квалитетот на водата е се уште добар,за што се вршат зачестени испитувања во Филтерницата за квалитетот на водата да биде на исто ниво како што треба да биде по сите светски стандарди.

А.Б

Шеснаесетта недела Битола и регионот се зафатени од суша што доведе до исцрпување на водните ресурси на ЈКП Водовод Битола. Директорот Горан Козаров вели дека Битола може да со соочи со алармантна состојба доколку во наредните денови не падне дожд. Во овој период битолчани се снабдуваат со вода за пиење од  Хидросистемот Стрежево.

Над сто пожари гореле синоќа низ Пелагонија кои неконтролирано се ширеле низ полето од запалени стрништа, потврдуваат од ТППЕ.

Противпожарната единица интервенирала на десетина пожари. Од таму велат дека палењето ноќе на стрништата е новина, затоа што претходно не се случувало. Сега нивите се чистат по темница за земјоделците да не бидат забележани кога го опжаруваат ѓубрето, иако пожарите се гледаат од километарска оддалеченост

Како што пренесува ТВ Тера, поради пожарите вдлож железничката линија синоќа кај Тројкрсти запрел и возот кој сообраќал на релација Скопје-Битола па по половина час го продолжил патувањето

Е.М.

Рели трка низ книга за учениците од основните училишта „Тодор Ангелевски“ и „Гоце Делчев“ организираше Австриската библиотека од Битола која е сместена во Универизитетската библиотека „Св. Климент Охридски“. Преку креативна игра учениците се потикаа да читаат книги од германското јазично подрачје, но и стекнаа знаења како да пребаруваат литератира од Австрската библиотека.

„Во рамки на Месецот на книгата организираме работилници со ученици основци и средношколци. Идејата за вакви средби со ученици е да се запознаат со начинот како да пребаруваат во Австриската библиотека, како да се снајдат со сигнатурата, да ја напишат, да ја донесат на шалтерот, да изнајмат книга и да читаат“, рече д-р Валентина Илиева, раководител на Австриската библиотека во Битола.

Паралела помеѓу еден од најзначајните настани во македонската историја, Крушевската Република и актуелните сосотојби во Битола, повлече советничката од Поинаку, Габриела Илиевска, на денешната седница на Советот, каде на дневен ред беше ребалансот на Буџетот на Општината. Илиевска констатираше дека за време на 10-те дена Крушевска Република биле реконструирани повеќе улици отколку денес за време на владеењето на СДСМ.

-Вчера слушам дека ние во Битола ќе сме ја реконструирале улицата „Крушевска Република“. Искрено да ви кажам, Крушевската Република траеше 10 дена и таму за тие 10 дена појќе улици реконструираја отколку вие од ко сте дојдени на власт во Битола. Појќе. Ние во овие две години можиме да се пофалиме само со улицата „Климент Охридски“ која двапати ја плативте и која служеше за потсмев на цела Македонија, рече советничката Габриела Илиевска.

Е.М.

Нови 2, 5 милиони денари за субвенционирање на мерки против аерозагадувањето издвои власта во Битола со ребалансот на буџетот. Валентин Груевски, претседател на Советот  на Општина Битола денеска најава дека и  овие пари  ќе бидат предвидени за намалување на аерозагадувањето за што Општината дополнително ќе објави детали во наредните денови.

-Претходно 2, 5 милиони денари беа издвоени за субвенционирање на клима уреди, а сега уште 2 и пол милиони денари  за мерки против аерозагадувањето, најави Груевски.  

За Иванчо Тошевски од Вмро Дпмне со доаѓањето на СДСМ на власт имало зголемување  на загадувањето на амбиенталниот воздух за најмалку три пати повеќе од она што било претходно.

-Мерките кои се преземаат се далеку од суштински, туку станува збор за популистички мерки , а крупните проекти она што требаше да биде темел на борбата против загадувањето  во делот на пречистителната станица, гасификацијата, топлификацијата, филтрите во РЕК-Битола во моментов сите процеси се стопирани , со нула проценти реализација, рече Тошевски.

Што се однесува до реализацијата на буџетот за третиот квартал за власта таа е позитивна, а за опозицијата  неповолна.

Груевски вели дека реализацијата за третиот квартал е околу 72 проценти, одлично достигнување  во однос на прибирањето на приходите.

-До крајот на годината ги зголемуваме парите за јавната чистота  за 4,5 милиони денари. Одржувањето на зеленилото на 4 милиони денари . Ја зголемуваме програмата за заштита на животната средина на 2, 5 милиони денари , одвојување пари за купување на акциите на Еурофарм Работник  со што го заокружуваме процесот на спојување на двата клуба. Ги зголемуваме парите за лед осветлувањето низ градот, со што продолжуваме со промена на сијалиците по улиците со лед осветлување . Ја зголемуваме социјалната помош, и во однос на другиот дел имаме зголемување на платите на ЈП Комуналец за околу 6 проценти, рече претседателот на Совет Груевски потенцирајќи дека една од поважните работи е тоа што се издвојуваат пари за плаќање на долговите на училиштата во основното образование, она што беше наследено  од претходниот период.

За Тошевски бројките  од извршувањето на буџетот го покажуваат неработењето на власта.

-Во делот на јавното осветлување додека градот ни е во темница имаме намалување на ставката од 10 на 3 милиони денари, а со третиот квартал локалната власт досега успеала да реализира 1, 28 проценти. Во делот на изградба на улици има зголемување на ставката од 26 милиони на 61 милион денари , а со трет квартал се реализирани 32 проценти. Во делот на реконструкција на улици од планираните 65 милиони имаме намалување на 39 милиони денари, а реализирани се  14 проценти. За атмосверска и фекална канализација од 43 милиони денари ставката е намалена на 29 , а реализирани се 12 проценти, рече Тошевски.

А.Б

Делови од Пелагонискиот Регион, посебно местата што ги спојуваат рамните со високите делови од земјиштето се подложни на свлечишта, изјави Милорад Јовановски, професор на Градежниот факултет во Скопје на денешната обука за јакнење на капацитетите за справување со природни непогоди во организација на Центрот за равој на Пелагонискиот плански регион.

„Пелагонискиот регион е подложен на свлечишта, не во рамните делови, туку во контактните делови со планинските региони, во делот кон Пелистер, делот каде што поминува делумно хидросистемот ‘Стрежево’, кај Ниже Поле има оштетување на патот. Во ободниот дел да го наречам на Пелагонискиот регион има доста такви појави. Обиколницата на Битола година и пол беше прекината поради санација на свлечиште“, рече Јовановски.

Општина Новаци ја подобрува патната инфарструктура преку искористување на средствата од Програмата за финансиска поддршка  на руралниот развој  од 2018 преку подготвени проекти кои се реализираа во 2019 г .Од оваа програма Општина Новаци искористи над  32.000.000 денари инвестирајќи ги средствата во Изградба на Локален пат Р511 –крстосница- с.Старавина-с.Будимерци  до манастирот  Св.Атанас - с.Старавина во должина од 811 метри.  Реконструкција на локален пат до населено место с.Тепавци во должина од 3 км ( вредност 19 милиони денари ) како и Изработка на урбанистичка планска документација  за с.Новаци , с.Рибарци,.с.Будимирци , с.Градешница,. с.Гермијан .Општина Новаци ги искористи средствата по сите три мерки 321, 322 и 323 од Програмата за рурален развој .

Изградба на локален пат  до манастирот во с.Старавина  во должина 811 метри за што се потрошени средства од 4.601.062 денари од Агенцијата за финансиска поддршка во земјоделството и руралниот развој од мерката 323 -зачувување и унапредување на традиционалните вредности во руралните подрачја. Изведувач на работите е СВ ИНВЕСТ Дооел Битола.

„Го развиваме и унапредуваме манастирскиот туризам“, велат од Општина Новаци.

А.Б

Во знак на долгогодишното пријателство збратимените општини, Новаци и Дуги Рат од Р.Хрватска организираа заеднички културно-уметнички концерт „Вечер на пријателство" кој се одржа во општинската сала во Новаци .

На фолклорната вечер присуствуваше градоначалникот на општина Новаци Љубе Кузманоски како општина домаќин на настанот, градоначалникот на општина Дуги Рат од Р.Хрватска Јерко Роглич, претседателот на Фолклорната федерација на Македонија -ЦИО  Антонио Димитровски, претседателот на хрватскиот центар и Македонско-хрватското друштво Марко Марулич од Битола ,Бранко Маретич , гости од локалната самоуправа и Советот од Дуги Рат како и фолклорни друштва КУД НОВАЦИ од Новаци , КУД Илинден од Битола и КУД Далмација од Сплит .