Пожарникар од ППЕ од Битола пријавил во полиција дека од жители на Ротино противпожарната екипа била спречена при гаснење на пожар на куќа.

На 18.10.2019 во СВР Битола, вработен во Територијалната противпожарна единица Битола пријавил дека на 17 октомври околу 23.00 часот, при интервенција за гасење пожар во куќа во с.Ротино, тој и неговиот вод бил спречуван во извршување на службените  дејствија од неколку лица. Се преземаат мерки за расчистување на настанот.

Битолската компанија Синпекс за прв пат во земјава  испорача електрична голф-кола E-Z-GO EXPRESS L6 ELiTE, производ на добропознатиот производител на возила од овој тип Е-Z-GO од САД.

Овој голф-мобил е придвижуван од електричен мотор со моќ од 9,8kW и SAMSUNG батерија од 56V, може да понесе 6 патници, а максималната брзина му е 28km/h.

Возилото е веќе испорачано кај клиент во Македонија. Од компанијата СИНПЕКС од Битола на сопственикот му посакуваат долгогодишна експлоатација без никакви проблеми.

Интернационалниот фестивал на аматерски документарен филм „Камера 300“ почна со прегледување на 35 аматерски документарни филмови на автори од 10 европски држави.

Претседателот на Советот на фестивалот Стефан Хаџи Андоновски истакна дека за најдобрите ќе бидат доделени традиционални награди, а од оваа година новина е наградата за сценарио која го носи името на долгогодишниот член на жирито на овој фестивал, неодамна починатиот Стево Сидовски.

-Жири комисијата ќе ги награди најдобрите и според квалитетот на документарниот филм, а само еден автор ќе ја добие највредната награда, односно гран при плакета „Милтон Манаки“. Инаку според востановената традиција фестивалот ќе додели и други награди и признанија, а Советот на фестивалот одлучи досегашната награда за сценарио да ја именува според  долгогодишниот член на жирито на овој фестивал, неодамна починатиот Стево Сидовски, истакна Хаџи Андоновски.

Наградените филмови ќе бидат премиерно емитувани во рамки на празничата програма на Општина Битола посветена на Денот на ослободувањето на градот – 4. Ноември.

НУ Центар за култура Битола во соработка со Амбасадата на Исламска Република Иран организираат "Недела на ирански филм" од 21-27 октомври 2019 г. и имаат чест да ве поканат на церемонијата на отворање со проекција на филмот:
Коцка Шеќер- 21 ОКТОМВРИ (понеделник), 19:30 ч, НУ ЦЕНТАР ЗА КУЛТУРА - Битола (мала сала)
Неделата на ирански филм се организира за прв пат во Битола. Ќе бидат прикажани седум филмови, во периодот од 21 до 27 октомври .

На 21.10.2019год, Н.Е Хосеин Карими - Амбасадор на Исламска Република Иран во Република Македонија ќе дојде во посета на Центарот за култура по повод отварањето на "Неделата на иранскиот филм". 

ЈЗУ Клиничка Болница Битола се вклучува во одбележувањето на oктомври како месец посветен на подигање на свеста за ракот на дојка. Заедно со „Кромберг и Шуберт“- Македонија ДООЕЛ Битола ја отпочнуваат првата кампања под мотото: „Надеж,храброст и сила-заедно спасуваме живот“. Првиот бесплатен  ЕХО скрининг  на дојка започнува во просториите на „Кромберг и Шуберт“- Македонија ДООЕЛ Битола, каде сите вработени од оваа компанија можат да се јаваат на преглед кај медицинската екипа од Болницата која таму е секој ден овој месец. 

Битолчанецот Владе Станковски-Тито, македонски шампион во боди билдинг и фитнес минатиот  викенд во Скопје на Diamond Cup 2019 го освои третото место во категорија ветерани, во конкуренција од 25 држави и околу 150 натпреварувачи.

Станковски е повеќекратен државен шампион во категорија ветерани и во полутешка категорија. Има освоено и титула Апсолутен шампион на Македонија во боди билдинг и фитнес. А учествуваше и на натпреварот  Атлета на Македонија каде беше прогласен за шампион во категорија ветерани, над 40 години.

-Долгогодишен труд и постигнати успеси вредни за спомунување, претставник на нашиот град единствен со толку освоени медаљи наши и на меѓународни натпревари. Татко на 3 деца, вработен , но како е прав спортист има време за се. Најубавите мускули се градат со многу љубов и трпение, а не инстант преку ноќ, велат од тимот на Станковски.