Препознатливиот далматински мелос, на 2 јуни во петок во Офицерскиот дом во Битола ќе го донесе далматинската машка клапа „Жрновница“, а по повод Денот на државноста на Хрватска. Настанот е со почеток од 19 часот.  Оваа манифестација веќе традиционално е во организација на  Хрватскиот културен центар и Македонско -хрватското друштво „Марко Марулиќ“ – Битола, а оваа година во соработка со КИЦ.-Офицерскиот дом.

Клапатa „Жрновница“ доаѓа од истоименото место, предградие на Сплит, Хрватска. Континуирано работи од 2008 година, а е основана од нејзиниот долгогодишен водител, маестро Марко Марин. Имаат учествувано на многу фестивали, концерти во Хрватска и во странство, настапувале во Франција, Италија, Црна Гора, Босна и Херцеговина, на Хрватскиот музички фестивал во Виена, Австрија, Словенија, Чешка и со задоволство како што ни изјавија, настапуваат на бројни хуманитарни и други културни настани.

Клапата негува полифоно пеење на далматинскиот мелос, а во својот репертоар, покрај традиционалните „а капела“песни, изведуваат и далматински песни со инструментална придружба на мандолина, гитара и бас. Изведуваат композиции од духовен карактер, класични композиции, аранжмани на популарни композиции, а негуваат и традиционално народно пеење.

Во програмата за одбележување на овој значаен празник за хрватската историја, народниот театар од Сињ ќе ја изведе претставата „Семејна идила“ од М.Ненадовиќ, адаптација и драматизација на Жељко Вицулин.  Премиерата на оваа претстава беше минатата година, а по барање на публиката досега е изведена над 20 пати во Хрватска. Народниот аматерски театар од Сињ е основан во 1956 година. Во сите овие години од нивното постоење подготвиле повеќе од 160 премиерни изведби. Овие бројки покажуваат дека овој театар и покрај кратките прекини, е еден од најактивните аматерски драмски театри во Хрватска. Во последните 10 години, со континуирана и професионална работа, театарот се издигна на едно повисоко ниво по бројот на поставени премиерни претстави, како и во учества на фестивали. На одбележувањето на нивното 60 годишно постоење ја добиваат Наградата на Сплитско-Далматинскиот округ за културна промоција на градот и регионот во Хрватска и странство.

Градоначалникот на општина Битола, Тони Коњановски, денес на прес конференција и со писмена иницијатива, ја повика претседателката на Советот, Габриела Илиевска, да започне со работа во интерес на граѓаните кои и ја дале довербата, а со тоа да запрат кочниците и блокадите на општината.

Изјава на градоначалникот Тони Коњановски (видео):

Почитувани граѓани,

Моја должност, но и обврска на сите нас кои сме ја добиле довербата од Вас, е да работиме, да се фокусираме на проекти и одлуки, со кои Битола ќе напредува, со кои ќе се реализираат активности и ќе се подобруваат условите во општината.

За жал, како никогаш досега, имаме ситуација во која, претседателката на Советот, во континуитет, веќе 2 месеци, личните желби и интереси, ги става над потребите на граѓаните. Искажувајќи некакво незадоволство од локалната самоуправа, останува на функцијата за која е платена со пари на битолчани и се обидува да докаже некаква своја правда, дури и кога не само јас како градоначалник, советниците и општинските служби, туку и повисоките државни институции и укажуваат дека постапува погрешно.

Покрај донесеното решение од државниот инспектор за локална самоуправа, претседателката одбива да постапи по истото и да ги стави на дневен ред точките со кои:

-          Пред почетокот на летото кога постои најголема опасност од пожари, ќе се усвои Програмата за работа на ТППЕ Битола

-          Програмата за финансирање и изработка на урбанистички планови, што е директно поврзано и со потребите на бизнис секторот од Битола

-          Измената на Програмата за развојни планови, со што ќе се овозможи уредување на просторот кај поранешен ЈАТ

Блокадите и кочниците всушност  покажуваат дека да се работи ПОИНАКУ, значи да се покажува самоволие,ароганција и фрустрации и сето тоа на штета на сите нас,Битола и битолчани.

Ваквата ситуација мора да се промени.

Затоа, до претседателката на Советот испратив иницијатива за брзо постапување по забелешките на државниот инспектор и ставање на наведените точки на дневен ред, меѓу кои е и точката за донесување на одлука за утврдување и исплата на надоместок на штета предизвикана од каснување од бездомни кучиња на јавни површини.

Општина Битола, мора да продолжи да функционира, а секој кој не е подготвен за одредена функција, треба да најде начин тоа да им го образложи на граѓаните.

Проектите ќе продолжат, а Битола ќе напредува. Очекувам ова да биде желба и начин на делување и на претседателката на Советот, зошто на тоа јавно се обврзала.

Учениците од Гимназијата „Јосип Броз –Тито“ уште еднаш ја потврдија својата драмска и театарска умешност, подготвувајќи театарска претстава во која режијата, сценариото, улогите, кореографијата, костимографијата и другите пропратни елементи ги подготвија и ги изведуваат учениците. Претставата „Далеку, а сосем тука“ е под менторство на професорката по клаични јазици Софија Бејковска. Режијата и сценариото се на матурантката Бисера Стефановска, а како асистен на режија и сценарио се јавува Ангела Цветковска и асистент на сценарио Ана Марија Петровска.

Премиерата за вработените од Гимназијата е закажана за 31 мај, на летната сцена во Тумбе кафе, а следните два дена, на први и втори јуни, ќе има реизведби за учениците од Гимназијата. 

Се насетува крајот, кога заокружуваме уште една учебна година. Заклучно со 14 јуни, остануваат уште нецели три седмици, кога полуматурантите ќе бидат пред предизвикот наречен: запишување во идно средно образование, а на останатите ученици, ќе им започне летниот распуст. Наставна година исполнета со многу наставни и воннаставни активности, предизвици, зачестени апликации на Еразмус проекти и уште многу други тековни работи. Вложениот труд, на крајот секогаш се исплаќа.

Во овој текст, ќе го насочам вниманието на две точки: одговорноста на наставникот и одговорноста на ученикот.

1.Одговорноста на наставникот

Лично за мене, одговорен наставник е оној, кој:

-работи со многу љубов и волја во својата наставничка професија;

- почитува училиштен Кодекс;

- секогаш позитивно размислува пред многуте негативни соочувања;

- верува дека работите секогаш можат да бидат подобри;

- ги извршува сите задолженија дадени од директор на училиште, стручна служба итн.

- си ја гледа својата наставна работа и гради професионален однос со колегите (значи, не трачари, не завидува и сл.);

- има цел од ученичето, да направи прав ученик со: посветена, трпелива и макотрпна работа;

- професионално се надградува, користејќи искуства од повозрасни колеги, како и искуства од други училишта во нашата земја и пошироко;

- излегува секогаш во пресрет на колегите кога треба да им помогне, да ги замени кога се отсутни и сл.

- не се жали дека му е напорна работата, или пак, како ќе се издржат 7 наставни часови денес;

- е способен и квалитетен во својата наставна област, а доследно и точно, дава одговор на поставено прашање од научната област;

- има задоволство да учествува на настани поврзани со предметот/предметите што го/ги предава (натпревари, патронат, екскурзии...);

- предложува наставни и воннаставни активности што би биле од добробит за самото училиште, па и за градот каде што се наоѓа училиштето;

- сака да соработува со локалната самоуправа и да даде допринос во функционирањето на образовната дејност;

- има чест да комуницира со родителите за нивните деца и постигнувањата на училиште...

- постојано не препрашува дали имало плата или не (нормално дека ќе има, за тоа работиме, законска должност е вложениот труд да се плати).

И така, наставникот има уште многу други обврски и одговорности (не само, горенаведените 16) кои треба: посветено, професионално и етички да ги извршува. Но, ќе оставам нешто и за следна прилика.

1.Одговорноста на ученикот

Лично за мене, од одговорен родител, произлегува и одговорен ученик, кој:

-мора да почитува училиштен Кодекс, наменет за него;

- води сметка за културата на изразување и комуницирање со соучениците и со наставниците, па и воопшто;

- ги извршува сите активности поврзани со наставните предмети што ги задава наставникот и самото училиште;

- не се спротивставува и разбрано се однесува;

- со задоволство учествува на: натпревари, патронат, активности поврзани со наставата и вонучилиштни предизвици;

- покажува интерес за: додатна, дополнителна настава, како и секции...;

- максимално го користи својот потенцијал и дар што го поседува, во давање на најдоброто од себе,

- континуирано учи, а не само пред тест и испрашување;

- не се „пазари“ за оценки, кога точно знае колку може да постигне;

- слуша наставник и прима добронамерен совет, кога навистина е потребен;

- се истакнува и се докажува со своите: знаења, интереси, вештини, способности...;

- дава конструктивни предлози за подобрување и напредување на училиштната клима;

- е културен и цивилизиран пример не само во училиштето, ами секаде;

- соработува со наставниците, а не се ограничува на еден или двајца наставници;

- не манипулира, не се расправа, не подлегнува под негативно влијание (на соученици, или пак некој друг во училиштната средина);

- секогаш и секаде позитивно и радосно го претставува своето училиште и наставниците.

Одговорноста на ученикот, многу значи и треба да биде стабилна и во најдобро светло прикажана. Настрана од технолошката зависност (мобилен телефон, социјални алатки, компјутер и сл.) ученикот има обврска да остане: добар и за пример и никако поинаку! Затоа, како што почнав погоре, најважни се: влијанието и улогата на домот, од каде што ученикот тргнува. Ако се влијае воспитно, тогаш нема да имаме проблеми, но ако се допушти слобода на однесување (каква што ја гледаме и доживуваме), тогаш проблемите само ќе растат, а нема да се решаваат.

За крај на овој мој текст, Драги ученици: Ви го честитам постигнатиот успех на училиште (запомнете, за Вас учите и можете многу да постигнете); имајте добро лето, но не заборавајте: читајте и другарувајте со книги, богатете го речникот и културата на изразување. Негувајте ја македонската белетристика. Оставете ги настрана социјалните мрежи, или паметно користете ги. И одете по разумен и нормален пат во животот! Верувајте дека е исплатливо и корисно! Останете: среќни, паметни и добри!

Автор: Александар Адамовски, професор по македонски јазик и литература и француски јазик