Во изминатите неколку денови на територијата на општина Битола од страна на Шумската полиција од Битола  спроведени се неколку акции против дрвокрадството, при што се одземени 4 моторни пили, секири и рачни пили.

Против сторителите,  покрај пријави за бесправно сечење на шума, ќе бидат поднесени и пријави за бесправно движење во шума во време на забрана за движење во шума, информираат за апла од Шумската полиција

Основниот суд во Битола, кој е со проширена надлежност и ги решава предметите и од општините Новаци, Могила и Демир Хисар, се соочува со недостиг на судии. Годишно решава околу 22 илјади судски премети, а работи со 14 судии, од кои едниот е в.д претседател. Од судот велат дека согласно Законот за судовите како суд со проширена надлежност би требало да има 25 судии. Тоа значи дека недостигаат скоро половина. Недостигот на судски кадар се должи на пензионирањето на тројца судии од први јули годинава.

„Како одговор на вака настанатата ситуација, овој суд пристапи ко реорганизација на работниот процес, на начин што се изврши промена на распоредот на работата на судиите кои се на располагање, така што судии од граѓанска материја се вклучени да постапуваат и во предмети од прекршочна материја“, соопштија од Основниот суд Битола.

Ситуацијата се планира да се надмине со прилив на нов кадар за судии од Академијата за судии и јавни обвинители кои очекуваат дека ќе бидат избрани и најбрзо ќе започнат со работа во почетокот на 2023 година.