За 4 цм се зголеми водостојот на Преспанското Езеро за само една недела. Поради долгиот сушен период нивото на водата во езерото е загрижувачко, затоа што е  44 цм под апсолутниот минимум измерен во 2008 година.  Иако водостојот  е зголемен  за само 4 цм, врнежите се добредеојдени по долгиот сушен период.  

Почвата во пониските делови од Пелагонија е презаситена со вода, па низ нивите има појава на заезерување. Ниви покрај патот Битола- Меџитлија се претворени во езера, тоа се површини претежно под житни култури. Во изминатите 24 часа во Битола наврнаа 25 литри дожд на метар квадратен или во последните два дена 42 литри на метар квадратен. И од Центраот за управување со кризи јавија дека поради заситената почва со влага има и појава на заезерување во одредени рамници и делови на Пелагонија, Полог и други. 

Велушка Река ја претвори во кал живинарската фарма во Породин, откако вчера се излеа од своето корито и ја поплави. Нема угината живина, но надојдената река предизвика материјална штета.

Центарот за управување со кризи будно ја следи состојбата и преку своите Регионални центри навремено ги извести субјектите на СУК за навремено превземање на мерки и активности за спречување или надминување на последиците од излевање на водотеците.

Според информациите добиени од Регионалните центри за управување со кризи, засега состојбата со водотеците е стабилна, има зголемувања на водостојот, но нема излевања на истите, освен во Битолскиот регион.

По обилните врнежи од дожд на подрачјето на општина Битола во атар на с.Дихово е излеана Диховска Река и поплавена е помала земјоделска површина. Исто така, излеан е канал кај Брусничко Лавчански регион 1. Во атар на с Породин излеан е канал и поплавена е Живинарска фарма. Известени се надлежните субјекти и во моментов екипите се на терен.