Изградбата на северната трибина на стадионот „Под Тумбе кафе“, тече според предвидената динамика, така што до денес е изградена една четвртина од изведбата. Битола треба да добие стадион изграден според најсовремени европски стандарди со сите потребни инфраструктурни услови за меѓународни натпревари. На градбата на северната трибина се работи според плановите, па на терен може да се види дека градежните работи напредуваат, новиот објект ја добива посакуваната форма.  

-Моменталната состојба со изградбата на проектот „Изградба на северна трибина прва фаза“ изнесува 25% од вкупната реализација. Општина Битола во соработка со Надзорниот орган за изведба на проектот постојано ја следи динамиката на работа на терен, потврдуваат за Апла.мк од Општина Битола.

РЕК Битола започна со ремонтните активности предвидени за годинава. До средината на ноември ќе бидат направени редовни ремонти на Блок 1 и Блок 3 и капитален ремонт на Блок 2. Блок 1 ќе биде во ремонт до 3 јуни, по што следува ремонт на Блок 3 од 4 јуни до 7 јули. Осум години по модернизацијата, годинава капитален ремонт ќе биде изведен на Блок 2. Ремонтните активности на овој блок ќе траат од 15 август до 15 ноември.

Започна дистрибуцијата на изборниот материјал за вториот круг од претседателските избори кој ќе се одржи в недела на 5 мај. Процесот се одвива под силно полициско обезбедување.

-Можам да порачам на фалсификаторите да не се мачат, бидејќи овие ливчиња се презаштитени и не постои можност за фалсификат, нагласи  директорот на печатницата „Киро Дандаро“-Битола,  Драги Милошевски.

Претседателот на ДИК Оливер Дерковски истакна дека навреме започна дистрибуцијата на гласачкиот  материјал до секоја Општинска изборна комисија.

-Од печатницата „Киро Дандаро“ брзо и професионално се изврши предавањето на гласачкиот материјал и дистрибуцијата ќе биде навреме извршена од нашите 12 тимови. За вториот дел од кампањата можам да кажам дека помина мирно без некои посериозни нарушувања , кандидатите се држеа до свои агенди. Нормални се некои понервозни реакции од страна на кандидатите  во последните денови пред вториот круг на гласање, но за нас е важно во недела да имаме еден чист коректен изборен ден, со што ќе потврдиме дека граѓаните на нашите држава можат да излезат и на демократски и фер начин да покажат дека можат да се спроведат чисти избори во нашата држава, рече Дерковски.

Со Форум театар презентација насловена “Гласот на мојата генерација” група млади луѓе од Битола и Прилеп ги искажаа своите ставови и мислења по однос на различни предизвици со кои се соочуваат во своето секојдневие.

Презентацијата се реализира на 25 април во Паркот кај Саат кулата во Битола.

Преку Форум театар презентацијата беа претставени следните предизвици: неактивни и незаинтересирани млади луѓе да се вклучат во активности со кои би го дале својот придонес за заедницата во која живеат, проблемите на дискриминација и нетолеранција по различни основи и недостаток на спортски терени каде бесплатно може да се спортува, терени кои би биле достапни за младите со различна социјална позадина.

За време на презентацијата присутните гласно интервенираа давајќи алтернативни решенија на дадените проблеми, ги споделија своите мислења и ја збогатија презентацијата со свежа енергија која ни покажува дека младите луѓе без разлика на својата геогравска, етничка или социјална позадина треба и можат да интервенираат и да бараат решавање на предизвиците со кои секојдневно се соочуваат.

Презентацијата заврши со музичка изведба на композиција која ја подготвија самите учесници во процесот. Преку оваа композиција се испрати порака за активно вклучување на младите во процесите за надминување на негативните стереотипи, предрасудите и во процесите за градење на заедничко општество со подеднакви можности за сите.

Со овој настан започнуваме со одбележување и славење на Меѓународниот ден на џезот 30ти април и славејќи ја уметноста, ја истакнуваме неговата важна улога во охрабрувањето на дијалогот меѓу културите и цивилизациите, промовирајќи мир, меѓукултурен дијалог, почитување на различностите, почитување на човековите права и достоинство, промоција на слободата на изразување и родовата еднаквост.

На оваа презентација претходеше тримесечен циклус на креативни работилници креирани во насока да поттикнат креативно и критичко рамислување кај учесниците со користење на Форум театар и Џез музика како алатки.

Проектот го имплементораат МИДС Битола во партнерство со Државното музичко училиште Битола.

Проектот Јас сум гласот на мојата генерација е поддржан од ЕУ во рамките на проектот Поделено минато - заедничка иднина.

Во манастирскиот храм „Свети Јован Претеча“ во Слепче се одржа  честувување на Свети Кипријан Слепченски.

Oсквернавен е споменикот за италијанските војници на Македонскиот фронт 1916-1918 година поставен во Градскиот парк во Битола. Од спомен плочата откорната и одземена е фигурата во жолто-златна боја  која потсетува на светец и оставени се само мермерните плочи.

Битолчани кои секое утро пешачат во Градскиот парк  забележаа  дека за празниците споменикот е оштетeн и од фронталната  мермерна плоча недостасува фигурата која беше со големина околу триесеттина сантиметри. Тие претпоставуваат дека најверојатно е одземена бидејќи нејзината боја потсетува на злато.

Споменикот беше инаугуриран  пред само еден месец на 29 март кога на свеченост во Битола им се даде  почит на италијанските војници учесници на Македонскиот фронт. На настанот присуствуваше и амбасадорот на Италија во нашата  држава  Карло Ромео.

Уште едно прво место за 17- годишната Егенија Дивитарова, средношколка  иноватор од Техничкото училиште во Битола, која досега изработи две машини за гравирање со ласер, за кои доби награди на релевантни натпревари за млади иноватори во земјава. Овој пат, освои право место за најдобро креирано портфолио. Таа за Апла.мк изјави дека натпреварот го организираа од  Младинската асоцијација на средни стручни училишта во земјава- МАССУМ. На него учествуваа повеќе ученици од средни училишта, кои имаа задача да изработат портфолио за себе, слично како CV и при тоа да ги внесат своите досегашни успеси што ги постигнале на одредени натпревари, а  да запазат и одредени позиции кои се задолжителни. Од сите учесници од земјава, Дивитарова беше најуспешна, а ментори ѝ беа Цветанка Митревска и Гордана Танеска.

Жителите од неколку локации во градот бараат од Општина Битола, откако ќе започне со работа новото јавно претпријатие за паркизни, да ја преземе обврската за средување на хаосот со паркирани возила во улиците кои не се опфатени со зонско паркирање.