Регионалната манифестација „Тракторијада“ 2018 се одржа денеска во Битола. Целта на манифестацијата е да се мотивираат заинтересираните страни за нови пристапи кои ќе понудат разновидност на  економските активности, примена на кративни пристапи за нови форми на производство, ангажман на локална работна сила и одржлив развој на заедницата.

Вообичаено тракторијадата се организира на отворен простор, но заради ниските температури, настанот се одржа во конгресната сала на СИНПЕКС Битола.

На денешниот настан учествуваа 14 учесници, компании и поединци чија дејност некако е поврзана со земјоделството.

„Овие  манифестации се позитивно оценети  од страна на земјоделските стопанства, затоа што нудат можност да се промовират со своите активности, новитети и технологии.  Исто така може да  ги видат можностите кои ги нудат не само европските туку и македонските фондови. Битно е тоа да го направат оти има институции кои помагат во насочувањето и советувањето, како што е   од една страна здружението  Зелена берза а друга е АПРЗ која има можност да го советува земјоделецот. Тука се и други институции кои нудат можности кои не се директно поврзани со земјоделството“, изјави Петар Андонов претседател на еколошкото друштво Молика.

Ваквиот тип  на средби ќе обезбеди неопходни информации и насоки за преземање на подготвителни мерки за иницирање на пристап кон руралниот развој, што е неопходно на патот за приближување кон стандардите и политиките на ЕУ.  

Организатор на манифестацијата е Движење за околината МОЛИКА од Битола, а  во соработка со Здружение за едукација на земјоделци Зелена Берза и СИНПЕКС ДОО Битола . Настанот финансиски го поддржа Министерството за земјоделство шумарство и водостопнаство преку програмата за рурален развој.

Интензивно се чистат каналите околу Индустриската зона Жабени, до новата железничка пруга кон соседна Грција, локации каде каналите не биле чистени повеќе од десет години. Акцијата за чистење на каналите ја спроведува фирмата „Битолско поле“, која го стопанисува, користи и одржува системот за одводнување во битолскиот дел на Пелагонија и која работи во состав на АД Водостопанство на РМ.

Според раководителите на оваа подружница, во изминатава 2018 година од страна на подружница „Битолско поле“ Битола на територијата на општина Битола се исчистени 23 одводни канали со вкупна должина од 25850 метри.

Биомасата и нејзината искористеност за загревање  повторно ги седна на заедничка маса пограничните општини Новаци од македонска страна и Аминдео од грчка.

Во Младинскиот културен центар во Новаци се одржа  состанок помеѓу претставници на општина Новаци, АПРЗ и грчките партнери ДЕТЕПА, КРЕС и КЛУБЕ во рамките на проектот Agrowchain - „Одржливо менаџирање на агро отпадот за загревање на рурални средини“.

Проектот трае 24 месеци, започна во јуни годинава, а денеска  беше третата сесија на партнерите во проектот .

-Ние како општина сме партнер во проектот, се работи за вкупни финансии од 216 илјади евра кои со овој проект треба да се искористат за набавка на механизација. Со таа механизација ние ќе собираме биомаса која подоцна ќе ја користиме за загревање на парен котел и затоплување на градинката во Новаци. Сега правиме анализи и анкети со земјоделците дали се подготвени еден дел од отпадот да го отстапат за биомаса.  Веќе распишавме тендер за набавка на трактор со приколка, потоа приклучни машини , котелот за затопливање и балирачката, рече градоначалникот на Општина Новаци, Љубе Кузмановски.

Дваесетина дена црквата „Света Богородица“ во битолското село Трново е без струја, се жалат од Црковниот одбор. Велат дека струја снемало на 18 ноември кога влажниот и тежок снег ги искинал жиците од бандерите. Во исто време без струја останаа и повеќе битолски села, но таму дефектите беа санирани.

Протест за чист воздух се одржа попладнево пред Општина Битола во организација на независната советника група Поинаку. Присутните на протестот побараа да се преземат мерки за намалување на аерозагадувањето и субвенционирана цена на струјата во Битола.

Вработените од  ЈП„Пазари“ –Битола, денеска  на паркингот кај Новиот пазар се вклучија во еднодневна акција за чистење на отпадоци  и остатоци од смет и земјоделски  производи на земјените  површини околу пазарот. Иако просторот непосредно до паркингот е во приватна сопственост, сепак  лошата слика е последица од работата на пазарџиите и купувачите, па вработените решиле состојбата да ја поправат  со расчистување и собирање на ѓубрето околу паркингот. Иницијативата за акцијата доаѓа од новиот директор на ЈП „Пазари“, Владо Атанасовски, кој на оваа фукцијата е од почетокот на овој месец.

Протестот  организиран од советничката група на „Поинаку“ е апсурден, лицемерен и единствено служи за политички публицитет на организаторот, обвини Методија Илиевски,

Утрово на 81 година почина театарскиот и филмски режисер, драмски писател, теоретичар на театарот и професор по театарска режија и актерска игра Љубиша Георгиевски.

Тој е роден во Битола на 30 мај 1937-та година.

На македонската јавност и е познат и како кандидат за претседател во 1994-та година, беше амбасадор во Бугарија од 2000-2004 и претседател на Собранието на Република Македонија од 2006-2008.

Веста за смртта на Георгиевски на социјалните мрежи ја објави актерот Роберт Вељановски.

-Утринава Македонија се збогува со еден од најголемите нејзини синови! На 81 годишна возраст, почина најголемиот македонски театарски режисер, еден од најголемите умови што се родиле под македонското сонце, професорот Љубиша Георгиевски!!! Утринава почина мојот театарски татко!!!
Бог да те прости професоре и да ти подари царство небесно!!!, напиша Вељановски.

По повод новогодишните празници, Извршниот одбор на Здружението на пензионери од Битола, одлучи да додели новогодишни подароци на 40 деца од посебните паралеки во Основното училиште „Ѓорги Сугарев“. На овој начин пензионерите сакаат да им ги разубават празниците на дел од децата со посебни потреби од ова училиште, меѓу кои има и социјални случаи.

Ова беше една од одлуките што ги донесе Извршниот одбор на денешната седница под претседателство на Томе Димитровски. На седницата беа разгледани повеќе прашања од доменот на активностите на пензионерите. Оценето е дека досегашната соработка со Здруженијата на пензионери од другите градови низ Македонија добро се одбива, а и во иднина се планираат активности за понатамошно интензивирање на соработката. Воедно, прифатено е и барањето на хорот „Сирма Војвода“ на 23 декември годинава да одржи  целовечерен концерт во Центарот за култура. 

Битолчани не покажаа голем интерес да ја искористат мерката за субвенционирање на велосипеди, средства издвоени од општинскиот Буџет. Иако често на социјалните мрежи многумина бурно реагираат за аерозагадувањето кое , меѓу другото, доаѓа и од густиот сообраќај, 40 проценти од парите останаа неискористени, а останатите ќе бидат пренасочени за субвенционирање на печки на пелети.