Владо Атанасовски од денеска е директор на ЈП „Пазари“-Битола . Атанасовски е магистер по менаџмент во образование и е од редот на вработените.

Кликнете на сликата или ТУКА за преглед на панорамата.

Предавање за доброволно дарување крв одржа докторката Дијана Димитрова од Регионалниот центар за трансфузиологија од Битола пред членовите од Здружението „Порака“ и други млади битолчани. Целта на предавањето што се одржа во Социјалниот клуб Порака, беше да се запознаат младите со основните елементи на доброволното дарување крв и да се поттикнат да станат идни крводарители. Беше истакнато дека крвта е лек за кој што нема соодветна замена и само една дарувана кеса крв можете да спасите и до три или четири животи.

Предавањето беше најава за престојната крводарителска акција која во соработка со Црвениот крст од Битола на трети декември, Меѓународниот ден на лицата со посебни потреби ќе се одржи во просториите на „Порака“ во Битола на улица „Борко Левата“ бб, Дрвен пазар кај старото Орбис. 
Акцијата во понеделник започнува од 13 и ќе трае до 17 часот.

Познато е дека Битола и Прилеп се ривали од памтивек,  а сега некој се обидува да им продава прилепски фори на битолчани. Во продавница за облека во центарот на градот, чиј сопстевник е прилепчанец, на излогот се залепени натписи за попуст, каде со познатото прилепско “ЧЕ“, трговците  се обидуваат да привлечат повеќе муштерии.

Спомен обележје за загинатите војници и цивили во Македонискиот фронт по повод сто години од крајот на Првата светска војна беше отскриено денес во новачкото село Брод.

Градоначалникот на Новаци Љубе Кузманоски рече дека споменикот ќе биде сведоштво за минатото, но и потсетник за во иднина заеднички да градеме мир.

Триесетишестгодишниот Б.М. од битолското село Гермијан  ги поместил и оштетил граничните камени меѓници меѓу Македонија и Грција и во полиција го признал делото, соопшти Министерсвото за внатрешни работи. Нема информација кои биле неговите мотиви за инцидентот.

Двајца битолчани и двајца скопјани биле уапсени откако полицијата кај нив пронашла паковки со хероин, информира СВР Битола.

На уапсените им е поднесена кривична пријава за неовластено производство и пуштање во промет на наркотични дроги, психотропни супстанции и прекурсори, а судија за претходна постапка од Основен Суд Битола им одреди притвор од 30 дена“, соопшти портпаролот на  СВР Битола, Сања Стаматова.

Завчера кај месноста Стрежевски пат, во близина на селото Могила, полицајци од ПС Битола и од Одделот за недозволена трговија со дрога и оружје ги уапсила З.Б.(25) и Ѓ.Ч.(30) од Битола и С.М.(38) и Р.Б.(26) од Скопје.

Кај нив биле пронајдени и одземени 89 грама хероин.

До средината на декември годинава, Битола ќе добие полигон за практична обука и полагање на практичен тест на идните возачи од нашиот град и регионот.  Зоран Кузмановски, управител на Сообраќајниот испитен центар ``АМ`` ДООЕЛ- Битола за апла.мк изјави дека проектот  за полигонот  е завршен и за десет од петнаесет дена ќе се изгради и полигонот. Локацијата на полигонот е одредена во близина на селото Долно Оризари и според Кузмановски тој ќе се простира на површина од 5 илјади квадратни  метри.

Драматургот Горан Стефановски, кој вчера почина на 66 годишна возраст во Англија, ќе биде кремиран, а по негова желба пепелта ќе биде расфрлена во водите на Охридското Езеро.

Пријатели на семејството Стефановски на социјалните мрежи вечерва ја Пренусваат информацијата дека кремирањето ќе се одржи на 5 декември во Бархам Крематориум во Кентербери, Англија во 9,20 часот. Пепелта по негова желба, во пригодна прилика, ќе биде расфрлена во водите на Охридското Езеро.

Стефановски беше роден во Битола, а последните години живееше во Англија. Со неговите драми Битолскиот Народен Театар го достигна врвот. Вчера, токму на денот на неговата смрт, на сцената на Театарот во Битола се играше неговата драма „Дупло дно“. Битолските театарџии на  фејсбук страницата  на Битолскиот Народен театар напишаа : „Вечерва додека ја игравме твојата ‘Дупло дно’ не напушти, но само физички зашто делата твои ќе ни останат во аманет да не потсетуваат дека суштината е да се биде не добар ами одличен уметник, а истовремено голем човек чиј збор треба и мора да се чуе.“

Тој беше автор на легендарните и популарни драми „Јане Задрогаз“, „Диво месо“, „Лет во место“, „Хај-Фај“, „Дупло дно“, „Тетовирани души“, „Црна дупка“, „Демонот од Дебар Маало“. Неговиот потпис стои и на познатата ТВ-серија за опсименување на децата „Бушава азбука“, со која генерации деца научија да пишуваат и читаат.