ЈКП Нискоградба ја информира јавноста дека деновиве започна со изведба на нова канализациона мрежа на улица Тошо Даскалот.

Јавното претпријатие Водовод ја информира јавноста дека нивни екипи  работат на промена крак на водоводна мрежа на потегот помеѓу улиците Рузвелтова и Никола Тесла.

За првпат е потпишан Колективен договор меѓу Министерството за образование и Самостојниот синдикат за образование и наука на кој се приклучи и Независниот академски синдикат.

Со намалување на бројот на новозаболени  и  хоспитализирани, се затвораат одделите во  Регионалниот КОВИД центар во Битола. Клиничката болница во Битола се враќа  во редовна работа.

Полицијата пресече меѓународен канал за транспорт на наркотични дроги од Република Албанија кој минувал низ Македонија, а дрогата како крајна дестинација се носела во Грција. Вчера Одделот за криминалистичка полиција, Сектор за недозволена трговија со дрога, во заедничка акција со Одделот за сузбивање на организиран и сериозен криминал, Единицата за брзо распоредување и ресенската полиција пронашла и одзела 65 килограми марихуана во вредност од 200 000 евра.

Имено, во утринските часови, на регионалниот пат од Трпејца кон Стење, преку Галичица, биле сопрени две патнички возила, марка „мерцедес“, со албански регистарски ознаки, кои учествувале во вршењето транспорт на дрогата. При извршен преглед на возилата, од кои едното било управувано од К.К (25)., каде како совозач бил М.Ф.(28), а второто од Ф.Б.(42), биле пронајдени и одземени 3 големи торби со марихуана, спакувана во 44 пакувања.

Албанските државјани се приведени, а по насока на Јавен обвинител од Основното јавно обвинителство Ресен, дрогата е предадена на вештачење, при што било утврдено дека станува збор за вкупно 65 килограми марихуана, а против трите лица ќе биде поднесена кривична пријава.

Од 1807 пријавени граѓани, денеска во Регионалниот вакцинален центар во Битола вакцината ја примиле 1422. За ревакцина од 180 закажани, втора доза примиле 177, додека тројца не дошле на ревакцинација со Фајзер. Ампулата која се отвора за 6 дози, за да не се фрли неискористената вакцина, биле повикани 3 лица кои примиле прва доза. Со тоа вкупниот број на вакцинирани граѓани со прва доза и ревакцина е 1602, што е најмногу во еден ден  од почетокот на масовната имунизација.