Како што водите се вкрстуваат и мешаат во утробата на земјата, така и потегот на уметниците се меша на овие две колонии и заедничката енергија. Токму мисла на познатиот македонски рецитатор Антонио Павловски ја отсликува симболиката на збратимувањето на двете ликовни колонии „Де Ниро“ од Битола, која годинава се одржува во село Цапари и „Арт Поинт Гумно“ од Слоештица. Повелбите за збратимување беа потпишани деновиве во Цапари каде по 16 пат се одржува колонијата „Де Ниро“.

„Во моето сеќавање Слоештица како центар на уметноста за нашиот крај, ми носи мемориски сеќавања како село на вода. Не залудно човекот од Демир Хисар рекол дека Слоештица е нашата демирхисарска Венеција, каде што секоја куќа има своја река или поток. Исконски се имињата на нашите води. Блаже Конески вели дека етимологијата на Пелистер доаѓа од бели стени, а Цапарска Река извира од белите стени и заедно со нашата Црна Река го наоѓаат својот заеднички пат. Така и нашите имиња од под Црвиот Врв извира Бела Река која го храни селото Слоетштица, па се влева во Црна Река, па преку Вардар заедно завршуваат во Белото Море. Зарем не е тоа фантастична игра на зборовите како играта на потегот на четките на нашите уметници“, рече Павловски.

Повелбите за збратимување ги потпишаа Драги Филевски и Ирена Андреевска.

„Како сеќавање на тој свечен момент уметниците потпишаа или насликаа нешто, секој на по еден камен кој ќе остане во спомен на уметничкиот центар во Цапари“, рече Драги Филевски, организатор на колонијата „Де Ниро“.

Колонијата „Арт Поинт Гумно“ е од Слоештица, родното село на Петре М. Андреевски, а збратимувањето на колониите се одржа токму на 14 годишнината од смртта на македонскиот великан на пишаниот збор. Со тоа се даде заедничка нишка на ликовната и пишаната уметност.

„Како што водите се поврзани во светот така и ние сме поврзани, двете колонии и долго време соработуваме, така што ова е само симболично поврзување и потпишување, официјално буквално ние сме како една колонија според соработката иако имаме независни политики“, рече Сергеј Андреевски од Арт Поинт Гумно.

Инаку колонијата „Де Ниро“ годинава се одржува во село Цапари каде семејството Филевски изгради уметнички центар токму за оваа намена.

„16 колонија по ред единствена е по неколку моменти, за првпат ја одржуваме заедно со уште една многу значајна колонија ‘Арт Поинт Гумно’ од Слоештица. За првпат е тоа што планираме да се вклопиме во светскиот процес на заштита на природната средина. Имаме и еко ден. За мене посебно важно што оваа година се одржува во амбиент во село Цапари , наменски објект единствен затоа што сум бил на педесетина други колонии во други земји, но никаде толку наменски објект не сум видел“, реќе Панде Петровски, координатор на колонијата.

Во село Цапари од 25 до 30 септември гостуваат уметниците: Елена Ѓоргиевска, Симонида Филипова Китановска , Жарко Башески, Стефан Малбашиќ, Сашо Н. Алушевски, Симона Мирчевска и Вацлав Лукич . Почесен гостин беше Беди Ибрахим.

На уметничкото гумно во с. Слоештица од 25 септември до 5 октомври гостуваат уметниците: Дијана Томиќ – Радевска, Пандора и Сашо Саздовски, Филип Велковски, Горан Ристовски и Кети Талевска.

Членовите на Македонското научно друштво од Битола на денешното изборно собрание, за првпат избраа жена за претседател. Научното друштво кое опстојува шест децении во селдните години  ќе го води Невена Груевска, професор на Славјанскиот универзитет во Битола. Таа доаѓа на местото на досегшаниот прв човек на МНД, долгогодишниот новинар, публицист и професор Марјан Танушевски.

Новата претседателка Груевска високо образование стекнала на Факултетот за биотехнички науки во Битола во учебната 2005/2006 година и била прогласена за еден од трите најдобри студенти на генерацијата, каде од 2005-2008 година била ангажирана како демонстратор. Магистерски труд одбранила на ФБН - Битола 2009 година. Докторски труд изработен и одбранет на ФБН- Битола, 2016 год. Автор и коавтор на повеќе од 10 научни труда. Од академската 2017/2018 година ангажирана на МСУ Гаврило Романович Державин и избрана во звање –доцент, на Факултетот за безбедност при работа. На истата установа во академската 2018/2019 година е редовно вработена и ја извршува функцијата продекан за настава. Член на Македонското научно друштво – Битола од 2010.

Оригинални македонски носии со фасцинантни декорации на везови и бои, кошули, свилени марами, накит и над 200 предмети се изложени во Дубровачки музеи – Етнографски музеј Рупа во Дубровник, Хрватска. Најголемиот дел од примероците биле собрани порано на македонска територија од Јелка Миш, која својот работен век го посветила на собирање носии од регионите од поранешна Југославија, а потоа ги подарила на Музејот во Дубровник. Останатиот дел се сочувани од заедничка изложба на ниво на ФНР Југославија, која била претставена во западноевропските земји и потоа подарени на Етнографскиот музеј во Дубровник.

Апла: Вие сте единствениот национален обучувач во Битола за Националната платформа за учење на далечина која ќе се користи за време на оваа школска година. Што е вашата задача?

Н.Ш.: Национален обучувач подразбира да сте дел од тимот од 30 наставници од основните и средните училишта во земјава кои преку обуки ја добижуваат Националната платформа кон училишните обучувачи, а такви во нашата земја ги има 1615, тие пак, ја пренесуваат платформата, односно овој нов начин на онлајн настава, кон сите наставници и професори во училиштата. На 24 наставници доаѓа по еден училишен обучувач.