За празничниот викенд битолската полиција при контрола открила 18 пијани возачи. Контролите биле извршени за  зимска опрема, управување без возачка, нерегистрирани возила, непочитување првенство, исправност на возилата , товарни возила,  појас, светло и алкохол, во сите полициски станици на 828 возачи и возила.

При контролата кај 18 возачи откриено е присуство на алкохол и истите се  исклучени од сообраќај. Две  лица не користеле сигурносен појас , а 2 други возачи зборувале на мобилен телефон при управување на возило.
Еден возач  непочитувал првенство на минување и 2 други направиле прекршок при неправилно престигнување. Осум  возачи се  писмено опоменати ,а за неправилно паркирање издадени се вкупно 11 мандатни платни налози.
На 46 возачи  изготвени им се мандатни платни налози и ќе се соочат со соодветни глоби, а исто така изготвени се и 33 прекршочни налози. Исто така при контролата откриени се и други 30 видови останати прекршоци.                  
  На целото подрачје на Секторот за внатрешни работи Битола во текот на вчерашниот ден има случено 5 сообраќајни незгоди  од кои во една незгода едно лице се здобило со телесни повреди , а во другите сообраќајни незгоди причинета е само материјална штета.

Битола  денеска е под магла и намалена видливоста од 50 до 100 метри , а утрово темпаратурата се спушти до  -4степени Целизиусови.

Претежно облачно, сончеви периоди ќе има во крајните западни и источни делови. По котлините ќе има појава на магла, која по одделни котлини ќе се задржи во текот на целиот ден со променлив интензитет. Ќе дува слаб до умерен ветер од променлив правец. Температурата на воздухот ќе достигне од 1 до 10 степени.

Следува период на променливо облачно време со повремени врнежи од дожд и снег на пониските места, а на повисоките места и на планините од снег. Во втората половина од следната недела врнежите се очекува да бидат пообилни.

Густа магла вечерва падна над Битола. Видливоста е намалена на неколку метри. Маглата не дозволува проветрување на воздухот и сите загадувачки честички остануваа да лебдат над земјата.

Битолчани викендов побегнаа од загадениот воздух  искачувајќи се на Пелистер. На паркиралиштата пред Информативниот центар и хотелот Молика немаше слободно место од паркирани возила. Коли имаше паркирано дури и по патот. 

Димитар Ефтимов ЛИАКУ

На 20 јануари во 1921 година во Скопје е роден Димитар Ефтимов ЛИАКУ, припадник на македонското националноослободително и комунистичко движење во Вардарскиот дел на Македонија и учесник во Антифашистичката војна 1941-1944 г., лекар-хирург.

Студирал медицина во Софија, а бил партизански лекар во 15. Македонски корпус на Сремскиот фронт.

Медицински факултет завршил во 1949 г. во Белград. Хирургија специјализирал (со прекини) во Скопје и ја завршил во 1954 г.

Во 1952 г. бил испратен како специјализант на работа во Битола, каде што останал до пензионирањето во јануари 1987 г. Бил началник на Хируршкото одделение, примариус и виш здравствен советник во Битола.

Добитник е на повеќе награди и признинанија на СРМ и СФРЈ и носител е на "Повелбата д-р Трифун Пановски" - највисоко признание на Македонското лекарско друштво.

Вангел ЧУКАЛЕВСКИ

на 20 јануари во 1910 г. во Битола е роден Вангел ЧУКАЛЕВСКИ, припадник на македонското националноослободително и комунистичко движење и учесник во Антифашистичката војна во Вардарскиот дел на Македонија, воен пилот.

Во предвоениот период бил пилот, со чин капетан во бившата Југословенска војска. Во време на бугарската окупација на Битола го помагал антиокупаторското движење, бил организатор и член на градскиот НОО, а во почетокот на 1944 г. се приклучил на партизанските единици.

Во 1944 г. станал член на КПМ и командант на Четвртата оперативна зона на НОВ и ПОМ. Бил командант на Првата македонска НОУБ од денот на нејзиното формирање 8 јуни 1944 г., па се до 25 септември 1944 г.

Унапреден во чин мајор на НОВ и ПОМ на 1 јули 1944 г. и станал прв помошник на началникот на Главниот штаб на НОВ и ПОМ од 25 септември 1944 г. Бил избран за делегат на Второто заседание на АВНОЈ и учесник на Првото заседание на АСНОМ. Бил одликуван од Врховниот штаб на НОВ и ПОЈ со Орден партизанска yвезда во октомври 1944 г. и на 1 декември 1944 г. бил унапреден во чин потполковник на Народноослободителната војска на Југославија (НОВЈ).

По целосното ослободување на земјата од фашистичките окупатори ги стекнал највисоките офицерски чинови на Југословенската народна армија (ЈНА) и во нејзини рамки вршел разни одговорни должности. Починал во Белград, Србија, на 8 јануари 1983 г.

Бено Исак РУСО

На 20 јануари во 1920 г., во Битола е роден Бено Исак РУСО, припадник на македонското националноослободително и комунистичко движење и учесник во Антифашистичката војна во Вардарскиот дел на Македонија, генерал-мајор на ЈНА.

Завршил основно училиште, бил механичарски калфа. Служел воен рок во 1941 г. и бил заробен од германските сили и спроведен во логор. Избегал од логорот, се вратил во Македонија и се вклучил во НОАВМ. Во 1941 г. станал член на КПЈ, а во 1942 г. борец во ПО „Јане Сандански“ и во ПО „Даме Груев“.

Во 1943 г. бил во баталјонот „Мирче Ацев“. Бил политички комесар на чета, на баталјон, на бригада и на 41. дивизија. Како политком на 15. (македонски) корпус учествувал во борбите на Сремскиот фронт.

По војната завршил Виша политичка школа „Ѓуро Ѓаковиќ“ и Виша воена академија. Во 1960 г. бил унапреден во чин генерал-мајор.

Во пензија бил од 1970 г. Одликуван бил со: Партизанска споменица 1941, Орден југословенско знаме со лента, Орден заслуги за народ од прв ред и др.

Починал во Скопје на 18 јуни 2006 година.

                                                                                               подготвил: д-р Александар Литовски, историчар

На 8 годишна возраст Филип Чокузовски сокаше по светиот крст во битолското село Трн. Ни студот не го исплаши малиот Филип да учествува во обредот што се одржа во базенот во црквата Св. Никола во Трн. По крстот скокаа три момчиња, а среќа да го најди имаше Благојче Гулевски. Во Трн денес живеат помалку од стотина жители.

Од деветнаесетмината пријавени за фаќање на светиот крст во Општина Новаци оваа година најсреќен беше Ице Марковски од селото Новаци кој за прв пат го фати светиот крст .

Традиционално со фрлање на светиот крст во осветените води во сите православни храмови во општина Новаци се одбележа големиот христијански празник Богојавление-Водици .
Главната церемонија се одржа во црквата „Св. Атанасиј Велики“ во селото Новаци каде на светата богослужба присуствуваа голем број на верници.
Градоначалникот Љубе Кузманоски на  Марковски му додели парична награда .

Општината обезбеди парични награди и за сите  други верници кои го фатија светиот крст во сите четиринаесет населени места каде се негува традицијата на одбележување на Водици.
Градоначалникот Кузманоски уште присуствуваше на светиот чин на фрлање на крстот во с. Добромири и во с.Рибарци .

Градоначалникот Кузманоски на сите оние кои беа најсреќни и го фатија светиот крст им  посака здравје , среќа и бериќет.

Пратеникот од ВМРО-ДПМНЕ, Влатко Ѓорчев денешниот христијански празник Водици го прослави во Битола, присуствувајќи на традиционалното фрлање на светот крст во храмот „Свети Димитрија“.

„Денешниот празник Водици во Битола кажаува дека македонскиот народ е силно приврзан кон своите традициите, дека силно ги почитува и дека е поврзан за верата. Нека е за многу години, Бог се јави, нека донесе, мир,берикет и среќа до сите наши домови“, порача Ѓорчев.

Денешниот голем христијански празник Богојавление –Водици со себе ја носи симболиката на повторното раѓање, новите почетоци и ја испраќа пораката на заедништво, меѓусебно почитување и помагање, порача пратеникот и генерален секретар на СДСМ, Александар Кирацовски кој денес присуствуваше на богослужбата во црквата Свети Димитрија во својот роден град Битола и на традиционалното фралање на крстот.

И девојка денес скокаше по светиот крст во базенот кај црквата Свети Димитрија во Битола. Со години ова беше само машка традиција, а Ана покажа дека и девојките можат да учествуваат рамноправно во церемонијата. Таа беше единствената девојка меѓу триесетемина машки кои скокнаа во базенот..