Овие сончеви денови расте бројот посетители на пешачката зона што ги повзрува туристичките места Претор со Сливница и Крани. Местото слободно може да се нарече Преспанско корзо. Само викендов таму имаше околу петстотини гости од Битола, Прилеп, Ресен и други градови и околни села. Дел рекреираа трчајќи, везејќи велосипеди и ролери, а други пешачеа. Целата патека е долга околу пет километри во еден правец и е рамна без угорнини и удолнини, па е прикладна за пешачење и на деца и на постари лица.

Раководниот  тим на претпријатието кое стопанисува со градскиот водовод во градот Призрен-Република Косово изминатата недела  беше во посета на ЈПК „Водовод“-Битола . При обиколката на објектите на Битолски водовод се разменети  искуства за начинот на работењето и на двете претпријатија.
-Најголем акцент е ставен во примената на СКАДА системот на водоснабдување, нејзината намена во намалувањето на водните загуби и откривањето на злоупотребите, велат од ЈКП „Водовод“-Битола.

Ученици од деветто одделение од Основното училиште „Тород Ангелевски“ од Битола постигнаа голем успех на регионалниот натпревар по германски јазик што се одржа викендов во Прилеп. Деветтодделенците од ова училиште, на кои им предава наставничката Симона Монавчева, освоија две први и две втори места на натпреварот. Првото место го освоија Кристина Мицковска и Елена Марковска, а втортото место Илиана Николовска и Петар Божиновски. На натпреварот учествуваа ученици од Битола, Прилеп, Кавадарци, Неготино и други општини. Од ова училиште редовно постигнуваат високи резулати и на натпреварите по други предмети. 

Полициски службеници во Секторот за внатрешни работи Битола минатиот викенд извршиле контрола за зимска опрема, управување без возачка дозвола, нерегистрирани возила, непочитување првенство, исправност на возилата, товарни возила, безбедносен ремен, светло и алкохол на 1.424 возачи и возила.

При контролата, кај 31 возач откриено е присуство на алкохол и тие биле исклучени од сообраќај.

Едночасовната балетска претстава „Либертанго“ на Македонската опера и балет, која беше вечрва изведена во големата сала на Центарот за култура во Битола, ја крена на нозе битолската публика. 

Во горниот дел на главната битолска улица Широк Сокак, на потегот од некогашното кино „Македонија“ до вино бар „Буре“ и на улица „Рузвелтова“ в недела, 17 февруари, во периодот од 7 до 15 часот,  ќе има прекин во водоснабудувањето,   информираат од ЈП „Водовод“-Битола. 

 Станува збор за дефект, а екипите на ЈП „Водовод“ во овој период од денот ќе работат  на санирање на водоводната мрежа.

Најстариот жител на Битола има меѓу 514 и 568 години. Тоа е градскиот чинар, природна реткост која се вбројува меѓу најстарите дрвја на Балканот. Во Македонија постари од него се само охридскиот и скопскиот чинар. Векови поминале покрај него, а овој природен феномен и по толку долг живот како да останал вечно млад.

Интензивно се работи на изградба на стадионот под Тумбе Кафе. Изградбата на северната трибина се одвива според предвидената програма и динамика за реализација на проектот.

Неговата екселенција, амбасадорот на САД Џес Бејли, на крајот од својот амбасадорски мандат во земјава, кој истекува на почетокот на месец март, оствари работна средба со градоначалничката на Општина Битола, Наташа Петровска.

На средбата беше разговарано за веќе добро етаблираните односи на амбасадата на САД и Општина Битола.

Градоначалничката Петровска изрази голема благодарност до амбасадорот Бејли за одигрувањето на клучната улога при приклучувањето на нашата земја во Северно-атланската алијанса. Со овој чекор земјата се наоѓа пред историски момент, затоа што допрва ќе бидат почувствувани придобивките од областа на зголемената безбедност, што пак претставува и сигурност за идните инвеститори на економски план. Таа го истакна значењето на готовата железничка траса кон граничниот премин Меџитлија, која и по железнички пат треба да ги олесни комуникациите меѓу двете земји, особено за размена на стоки, значајни за производствениот сектор.

Проектите кои што се реализирани на територијата на Општина Битола, а се потпомогнати од страна на Американската амбасада и УСАИД, исто така се најдоа во фокусот на средбата. Амбасадорот ја потврди одличната соработка на општината и Американското катче при што го потенцираше и одржаниот саем на креативци, како можност за развојот на претприемачкиот дух на младите. Градоначалничката Петровска ги посочи можностите за натамошна соработка, согласно потенцијалите кои Битола ги нуди како пограничен регион, опкружен со многу природни убавини, а истовремено и со големи економски потенцијал.

Фотографија од стариот иконостас во соборниот храм „Св. Никола“ во Крушево кој изгорел во 1903 година за време на Илинденското востание, беше објавена денес на фејсбук профилот Крушево.

-Ова е најголемото достигнување на протомајсторот Петре Филиповски Гарката и неговиот зет Димитар Станишев. Но, за жал Гарката на крајот на изработката ослепел, запиша под фотографијата познатиот битолски копаничар Злате Крстевски.