Осма година со ред, Советот на Општина Битола дава дозвола во основните и средни училишта да се формираат паралелки со помал број ученици од законскиот кој изнесува 24. Во училиштето „Гоце Делчев“, во строгиот центар на Битола, во прво одделение ќе има паралелки и со осум ученици. И во други централни училишта има паралелки кои ќе опстојуваат со 11 или 12 ученици.

Советниците од Општина Битола велат дека редовна пракса стана донесувањето на ваква одлука.

Според Методија Илиекси од СДСМ, едната причина е намалениот наталитет, а другата тоа што учениците сакаат да учат во неколку средни училишта.

Според Горан Велевски, во ситуацијата прсти меша и политиката.

„Иако имаме малку деца треба да се направат нови паралеки со 10 до 12 ученици. Од една страна тоа е убаво, но од друга има политички аспект зашто локалната власт е приморана да ги изврши своите задачи за вработувања. И нормално ќе си постават свои кадри одделенски или по други предмети со цел да ја зголемат нивната кауза која е ветена“, рече Велевски.

Спортското игралиште за ракомет и кошарка во ОУ „Коле Канински“ - Битола добива нов лик. Започна поставувањето на гумирана подлога на игралиштето. Освен тоа, игралиштето ќе биде заградено со огради. Како што вели директорот на училиштето, Зоран Мирчевски, со новата гумирана подлога учениците ќе бидат позаштитени. Овој проект е донација од државната видеолотарија на Македонија.

-  Со ставањето на нова гумирана подлога, се подобрува квалитетот за игра и рекреација и ќе се овозможи поголема безбедност за заштита од несакани повреди. Освен тоа, просторот ќе биде ограден со жичена ограда - изјави директорот Мирчевски.

По поставувањето на гумираната подлога, следува и менување на сегашната дограма на спортската сала со нова, пвц дограма. 

Привршуваат и градежните активности околу првата реконструкција на фасадата на училиштето уште од неговата изградба во 1963 година. Како што вели директорот, фасадата треба да биде завршена со почетокот на новата учебна година.