Зоран Дојчиновски е избран за прв човек на новото јавно претпријатие кое ќе стопанисува со градски паркинзи ЈП за изградба и одржување на јавен простор за паркирање и уредување и организирање на јавен локален превоз на патници во Општината Битола.  Тој досега ја извршуваше функцијата  технички директор во ЈП Комуналец Битола.

Дојчиновски е дипломиран машински инженер со две децениско работно искуство во јавното претпријатие Комуналец.

Во април Советот со гласовите на владеачкото мнозинство на СДСМ и коалицијата ја изгласа одлуката за формирање јавно претпријатие за паркинзи и организрање јавен превоз во Битола. Ова јавно претпријатие ќе го преземе управувањето со зонското паркирање, зошто  на сегашниот концесионер „Стентон градба“ договорот му завршува за само неколку дена.

Во изминатиот период општинска комисија вршеше  увид во работат на „Градски паркинзи“, со цел да се изврши и примопредавање.

Таксистите од Битола бараат стартот да поскапи од 20 на 30 денари и цената да се зголеми за плус 3 денари од километар .

Не работат двете мерни станици за мерење на квалитетот на воздухот во Битола кои се во наделжност на Министерството за животна средина. Од граѓанската платформа „Земи здив“ реагираат дека мерната станица Битола 1 (се наоѓа на излезот на Битола кон Новаци) од вчера од 18 часот престана да ги прикажува вредностите на измерените ПМ 10 честички. Другата мерна станица Битола 2 која се наоѓа во центарот на градот не мери суспендирани честичики веќе три месеци.

Синоќа на полноќ автомобил удрил во бандера на улицата „Никола Тесла“ во Битола, во близина на Скопската пивара. Според очевидци, возачот минал без повреди, бандерата го издражала ударот, но не и автомобилот кој е  оштетен во предниот дел, па бил отстранет со помош на Шлеп служба. 

Уште првиот ден од првиот уписен рок во гимназијата „Јосип Броз Тито“ учениците кои се пријавија за упис ја исполнија квотата со распишани слободни места за прва година.

Во оваа Гимназија, која со години важи за елитна, денес се пријавија 207 ученици, а според конкурсот објавени се 204 слободни места. Од „Јосип Броз Тито“ за Апла.мк потврдуваат дека и оваа година интересот за упис е голем, а најмногу пријавени ученици има за природно-математичкиот смер , комбинација Б.

Претседателот на ЛДП, Горан Милевски влегува во  владата на премиерот Зоран Заев како иден министер за локална самоуправа. Оваа вест од партијата на Милевски ниту ја демантираат, ниту ја потврдуваат.

Силно невреме проследено со врнежи од град вчера предизвика сериозни оштетувања врз градинарските и житните култури во битолското погранично село Егри. Земјоделците се пожалија дека градот им го обра годинешниот род од пипер, жито, јачмен, пченка, бостан...

„Вчера по 16 часот не фати голема несреќа, сѐ што имавме посадено и посеано ни уништи. Пипер, пченка, јачмен. Врнеше 45 минути, паѓаше град голем колку орев. Невидено до сега. Зафати околу 200 хектари од полето. Се случувало и претходни години да врне град во овој период, но толку голем зијан во нашето поле не направил досега “, се пожали Манојле Ристевски, жител на Егри.

Од општина Битола соопштија дека после силните врнежи од дожд и град кои оставија големи последици врз земјоделските насади во неколку битолски села, а со цел локалната самоуправа да им помогне на земјоделците во намалување на последиците со кои се соочуваат, се повикуваат сите земјоделци од општината да достават барање за надомест на штета .

Доставените барања ќе бидат разгледани од страна на Комисијата за проценка на штети од елементарни и други непогоди.

„Денес заедно со колегите од Советот и претставници од Општина Битола ги посетивме оштетените земјоделски површини од град во атарот на с.Егри. Се повикуваат сите земјоделци од општината, во чии што земјоделски површини е направена штета, да достават барање за надомест на штета до Општина Битола. Заедно со барањето, потребно е да достават имотен лист од површината на која се наоѓа земјоделската култура, најдоцна до 24.06.2019 година до 16:00 часот. Веднаш по пристигнувањето на пријавите ќе бидат направени проценки и истите ќе бидат соодветно обештетени“, напиша на својот фејсбук профил началникот по земјоделство Методија Илиевски. 

Во Битола има 797 завршени основци, а според конкурсот распишани се повеќе од двојно слободни места во средните училишта. 

Адвокатот Васко Талевски е единствениот член од Битола во новоизбраниот Извршен одбор на СДСМ. Тој е меѓу 16 нови членови на Извршниот одбор што беа избрани на денешната седница на Централниот одбор на СДСМ што се одржа во Охрид. 

Уште еден јунски врел ден завршува со дожд  и грмотевици. Попладнево Битола беше зафатена од невреме. Температурата  која преку ден се искачи до 27 степени Целзиусови, попладнево падна за десет степени. Невремето се очекува да продолжи во текот на ноќта, а дожд да врне и утре.