Како дел од програмата на „Бит Фест“, а во организација на здружението на Центарот за културна деконтаминација – Битола, започна 12. издание на битолскиот фестивал на музиката и традицијата, „Локум-фест“ чија тридневна програма се одвива во старата битолска чаршија. Во првата вечер публиката имаше можност да ужива во звуците на бугарската група “Морски перли”, македонско-турскиот ансамбл „Балканатолија“ и „Чалгии мерак“.

Вечерва, главни ѕвезди се добро познатите „Баклава“ и гостите од Словенија групата „Ентузијазам“, а третата вечер, пак, ќе помине во знакот на „Вевки чалгија трио“ и гостите од Индија – „Тапи проџект“.

Повеќе од 60 деца од Танцовиот- спортски клуб „Експоуз“ од Битола настапија со свој незаборавен танцов хепенинг во рамките на Културно-забавно лето во Новаци. Танцовиот хепенинг "Експоуз танцува и Новаци танцува" се одржа во дворот на Општината.

Присутните гости беа воодушевени од од најразлични танци и кореографии на танчерите од различни возрасти. Тие настапија во најразлични поединечни и групни изведби покажувајчќи ја својата умешност да играат по ритамот на музиката.

Оштетена е една од спомен плочите поставена на местото на областниот централен бугарски фашистички затвор кај Црн Мост во Битола. На плочата која е скршена на половина стои името на Илиоски Иге од Дрен, прилепско, кој бил стрелан во 1941 година.

Овде биле затворани 250 политички затвореници, учесници во НОВ и Антифашистичкото движење од Македонија. Педесет од нив биле осудени на смрт, 20 на доживотна затворска казна, а останатите на строг затвор до 20 години. 

Има само 18 години, неколкумесечно музичко искуство, а веќе се закити со две  награди на неодамна одржаниот фестивал во Охрид „Канео фест“. Битолчанецот Божидар Николовски, како дебитант,  за неговата прва песна „Да си моја“ на оваа музчка манифестација ја понесе втората награда од жирито и наградата за најдобар аранжман. Комплетен автор на наградената композиција е Мими Марковски.

Нов борер за операционата сала на Одделението за ортопедска хирургија и травматологија набави менаџерскиот тим на Клиничката болница од Битола со сопствени средства. Новиот борер за работа веќе пристигна на Оделението и со него се замени постоечкиот кој беше стар повеќе од 30 години, безброј пати поправан, со што стана несигурен и ризичен како за пациентите така и за операторот.

Одржувањето на Реонскиот пазар во Нова Битола преминува во надлежност на сите  јавните претпријатија, а не само на ЈП „Пазари“. Советот денеска донесе одлука ЈП „Комуналец“ да ја одржува зелената површина, ЈП „Нискоградба“ канализационата мрежа, пасажите и скалите, а ЈП „Водовод“, водоводната мрежа. На овој начин, секое претпријатие ќе биде задолжено за нормално функционирање на работите  за кое е надлежно

Транспарентно трошење на парите за Битфест, бесплатниот превоз на ученици, програма за одбележување на значајни настани и истакнати личности  со спомен обележја беа дел од барањата  на советниците да се постават како точки на дневен ред  на денешната седница на Совет.

-Барам писмена информација од општина Битола со листа на сите апликации кои пристигнале за Битфест 2018 година и листа на сите апликации кои добиле средства и колкав е износот што  го добиле. Претходно се одлучуваше со Комисија кои апликации ќе добијат средства , ние имаме формирано Комисија за култура пред пет месеци и истата воопшто не е консултирана и воопшто нема увид на апликациите. Сакам да запрашам која  е улогата на Комисијата кога најголемиот културен настан  не е поминат на истата, побара независната советничка Габриела Илиевска.

Елена Трајчевска од ВМРО-ДПМНЕ побара дополнување на дневниот ред со точка  информација за организацијата на превозот на учениците во учебната 2018-2019 година.

-До нас како советници стигнуваат реакции од наши сограѓани , родители кои покрај тоа што согласно Закон да бидат ослободени од товарот на своите деца да им плаќаат превоз до училиште и назат, тие беа приморани последните месеци од учебната  година што измина тоа да го финансираат од сопствен џеб. Поради тоа барам информациија дали и како ќе биде организиран бесплатниот школски превоз од септември 2018 година? Се наоѓаме на 40 дена од почетокот на новата учебна година , а информациите кои ние ги имаме говорат дека за неколку училишта не се потпишани договори со превозници и нема постапки во тек, рече Трајчевска.  

Дополнување на дневниот ред побара и советникот на СДСМ, Методија Илиевски со три точки.

Програма за одбележување на значајни настани и истакнати личности  со спомен обележја за период од пет години од 2018-2023 година. Одлука за поставување на спомен обележја на скулптурата „Сончев часовник“ на локалитетот Еврејски гробишта. И како трета точка Илиевски го предложи барањето за добивање согласност за  измени и дополнувања на годишниот план за вработување за 2018 година за ЈПК „Коминалец“ .

До каде е воведувањето на дополнителните автобуски линии што ги вети градоначалничката Нашата Петровска во предизборието , побара информација независниот советник Иван Чулакоски, со посебен акцент на автобуската линија за населбата Баир.  

Мнозинството единствено ги прифати точките што ги предложи советникот на СДСМ, Илиевски, за останатите се гласаше воздржано.

Претседателот на Совет, Валентин Греувски рече дека Илиевска информациите како се делат парите за Битфест може да ги побара од Општина Битола како барање за слободен пристап до информации од јавен карактер или да го постави како советничко прашање до градоначалничката. Груевски образложи дека Петровска на почетокот на битолското културно лето транспарентно ја објави сумата што годинава ќе се троши за Битфест. Што се однесува до превозот за учениците, Груевски рече дека општината работи сериозно  на оваа постапка со законски измени во овој дел.

Мало маче, галениче на општинските службеници денеска влезе во  салата на Општина Битола, пред почетокот на седницата и почна да бара храна под масите. Но, место храна од советниците доби само гушкање. Пред да почнат да расправаат за точките од  дневниот ред мачето го изнесоа надвор за да не им мјаука на советниците  додека тераат политика.

Одлучил стручната пракса како дипломиран електроинженер да ја мине во РЕК „Битола“, иако имал шанса да избере престој во други европски земји. Германецот Себастијан Ох од Нинберг, дипломец на Универзитетот во Бајројт, северна Баварија, веќе неколку недели професијата ја усовршува во Рударско-енергетскиот комбинат во Битола. Одбрал да дојде на пракса во Македонија зашто за него била непозната земја, а слушнал дека има голема термоелектрана како РЕК.

„Никогаш досега не сум бил во термоелектрана од ваков калибар, со толкава големина, за мене е фасцинантно тоа што на едно место се наоѓа и производството и рудникот, тоа што имаа сопствен рудник за кој не треба да има долги и големи транспортни ленти“, вели Ох.