По наглото топење на снегот и порастот на температурите се поплавија подрумските кабинети во техничкото училиште СОТУ „Ѓорѓи Наумов“-Битола за што апла.мк објавува и низа фотографии . Причина за ваквата хаварија  најверојатно е понирање на вода во подрумот која  е резултат на оштетна атмосферска канализација или пак евентуално постоење на подземни води. Објектот на училиштето во континуитет тони во земјата што може веќе да се забележи и со голо око. Тонењето на објектот е отприлика од 10 до 20 сантиметри во зависност од позициите. Од раководството на школото велат дека денеска се соочуваат со поплавени кабинети за практична настава како и пропаѓање на дел од подовите кои се со мермерни плочки.

Во Македонија од утре се очекува нов студен и влажен бран, кој ќе услови врнежи претежно од снег, а во југоисточните делови од дожд, каде што врнежите ќе бидат обилни и поројни.

Локално, како што информираат од УХМР, прогнозирано е да наврнат над 30 литри на метар квадратен.

На повеќе места ќе има врнежи од снег и ќе се формира нова позначителна снежна покривка.

На планините над 50 сантиметри, а во пониските места од 10 до 20 сантиметри снег.

Утре со почеток од 20 часот во Народниот театар во Битола претпремиера на „Детето сонува'' од наградуваниот автор Ханох Левин во режија на гостинот од Израел Итаи Дорон, а премиерата е во сабота во 21 часот. Претставата е на главна сцена и трае околу два и пол часа. 

Со цел почиста и зелена Битола јавните претпријатија во општина Битола во следниот период имаат потреба од работно ангажирање на дополнителен број извршители. Се предлага работно ангажирање на 15 лица со ниско и средно образование за пет месеци. Одлуката треба да биде донесена на седницата на совет во вторник, идната недела.

Иселеничкиот бран од кој веќе подолг период е погодена Битола има негативни рефлексии и врз посетеноста на Народниот театар во Битола. Директорот Иван Јерлиќ вели дека посетеноста пред 10 до 12 години се движела од 13 000 до 15 000 гледачи, а сега е сведена меѓу 6000 и 8000.

Најголемата шетачка зона во градот, Широк Сокак од вчера рано утрото е посипана  со ризла за да не се лизгаат минувачите на гранитните плочки. Според ЈКП „Нискоградба“ ризлата е посипана по реакции на граѓани дека замрзнатиот дожд предизвикал  лизгање и несигурност кај граѓаните при движењето.

-Ризлата е фрлена вдолжи Широк Сокак и сега таа ќе послужи како подлога за новите врнежи од снег кои се очекуваат во четврток и петок, изјави Методи Силјановски директор на ЈКП „Нискоградба“.

Од Нова година досега по улиците низ градот и локалните патишта во општина Битола се фрлени 340 тони сол и 340 кубни метри ризла.

Екс градоначалникот Владимир Талески на досегашните аудиции во Народниот театар во Битола никој не одлучил да го земе во претстава, рече директорот на театарот Иван Јерчиќ. На новинарско прашање дали Талески доаѓа на работа и дали зема плата, Јерчиќ рече „ние познаваме многу повеќе луѓе кои ни се далеку од државата, па земат плата, а не одат на работа“.

„Во минатата година сите подели на улогите функционираа на принцип на отворена аудиција, Владимир Талески досега никој не одлучил да го земе во претстава, кога ќе одлучи некој, ќе се појави тој на работното место“, рече Јериќ.

Марија и Томас Русенгрен од хумантирната организација ХЕНД ТИЛ ХЕНД од Шведска, ја продолжуваат хуманитарната мисија во Македонија. Овој пат донираа 32 пара чизми од шведско производство како ХТЗ опрема за техничкиот персонал во Клиничката болница во Битола.

Центарот за развој на Пелагонискиот плански регион набави две нови возила за собирање на комунален отпад за општините Демир Хисар и Крушево. Проектот се реалзира во рамките на Програмата за рамномерен регионален развој за 2018 година на Министерството за локална самоуправа преку Бирото за регионален развој

Од ЈП „Пазари“ Битола се категорични дека како организатори на пазарите се против коморски систем на организирање на пазарите .

-Групацијата за зелени пазари е за укинување или одлагање на примената на Законот за трговија на зелени пазари поради ризик од опстанување на пазарите. Групацијата на пазари е против коморски систем на организирање на пазарите.

Градскиот и  Реонскиот  пазар во Битола  располагаат со 702 тезги,  така што во 2018 година се направени договори со 562 тезги, слободни се 140 тезги и од година во година има тенденција на намалување на закуп на тезги на зелените пазари.

Со законот што требаше да стартува на сила услови исполнуваа само 243 закупци од кои  174 земјоделци и 69 невработени. Тоа значи дека ако се примени законот прашање е колку од нив ќе закупат тезги, изјави Владо Атанасовски, директор на ЈП „Пазари“-Битола.

Атанасовски вели дека за овој закон доколку се одложи  треба да се седне на заедничка маса со сите засегнати страни, организаторите на пазари, тезгаџиите, претставници на Министерството за економија и пратениците како предлагачи на законот. По што да се донесе законот во интерес на сите засегнати страни и опстанок на зелените пазари.